Əvvəlki illərin məzunu olan abituriyentlərin imtahan nəticələrinə dair statistik məlumat

Mənbə: TQDK

Tələbə Qəbulu üzrə Dövlət Komissiyası (TQDK) may ayının 17-də (II və III ixtisas qrupları üzrə) və 24-də (I və IV istisas qrupları üzrə) ali təhsil müəssisələrinə əvvəlki illərin məzunları üçün qəbul imtahanı keçirmişdir. Bu imtahanlarda ümumilikdə 29004 abituriyent iştirak etmişdir.

İmtahanların gedişinin hər bir məqamı, eləcə də sonrakı proseslər–testlərin ekspertizası və etalonların müəyyənləşdirilməsi, imtahan protokollarının araşdırılması TQDK-nın internet saytında operativ şəkildə işıqlandırılmışdır.

İmtahanda abituriyentlərə təqdim olunmuş test tapşırıqları ümumtəhsil məktəblərində istifadə olunan tədris proqramlarına və dərsliklərə tamamilə uyğun olmuşdur. İmtahandan əvvəl qapalı rejimdə, imtahan başa çatdıqdan sonra isə müstəqil ekspertiza bunu bir daha təsdiq etmiş, suallarda hər hansı elmi, texniki xəta olmamışdır.

Cavabların emalı başa çatdıqdan sonra nəticələr qısa müddətdə (mayın 17-də keçirilən imtahanın nəticələri mayın 19-da, mayın 24-də keçirilən imtahanın nəticələri mayın 26-da) TQDK-nın internet saytı, AZERCELL, BAKCELL və NARMOBİLE telefon xidmətləri vasitəsi ilə elan olunmuşdur. Bununla yanaşı, abituriyentlərə internet vasitəsilə cavab kartlarının qrafik təsvirinə baxmaq imkanı da yaradılmışdır.

TQDK hər bir imtahandan sonra həmin imtahanda istifadə olunan test tapşırıqlarının düzgün cavablarını «Space» televiziyası vasitəsi ilə elan etmiş, Komissiyanın məsul əməkdaşları və müstəqil ekspertlər birbaşa efir vaxtında test tapşırıqları, eləcə də imtahanların gedişi ilə bağlı abituriyentləri və ictimaiyyəti maraqlandıran sualları cavablandırmışlar. Bu tədbir həm abituriyentlərin öz ballarını rahat hesablamaları və onları maraqlandıran suallara cavab almaları, həm də ümumilikdə imtahan prosesinin şəffaflığının təmin edilməsi baxımından əhəmiyyətli olmuşdur. Abituriyentlərin ballarının hesablanması üçün xüsusi proqram hazırlanmış, TQDK-nın internet saytında və Facebook səhifəsində yerləşdirilmişdir. İstifadə üçün çox sadə olan bu proqramda abituriyentlər fənlər üzrə düzgün və səhv cavablarını müvafiq mövqelərdə qeyd etməklə avtomatik olaraq nisbi və ümumi balları haqqında məlumat ala və nəticələrini çap edə bilmişlər.

Qeyd edək ki, ilkin müsabiqə şərtlərinə əsasən I, II, III və IV ixtisas qruplarında (ödənişli əsaslarla olan ixtisaslar üzrə) müsabiqəyə ümumi balı 200-dən az olmayan abituriyentlər buraxılırlar.

Əvvəlki illərin məzunu olan abituriyentlərin imtahan nəticələrini qruplar üzrə təhlilini təqdim edirik.

I ixtisas qrupu üzrə imtahanda 11874 abituriyent iştirak etmiş, onlardan cəmi 963 nəfəri (8.11 faizi) 200 və daha yüksək bal toplamışlar. Beləliklə, 10911 nəfər 0-200 bal intervalında nəticə əldə etmişdir ki, bu da iştirakçıların 91.89 faizi deməkdir. 600-dən yuxarı bal toplayanların sayı isə 4 nəfər olub və və maksimal nəticə 647 baldır.

II ixtisas qrupu üzrə imtahanda 7224 nəfər iştirak etmişdir. Bu qrupda imtahanda iştirak edənlərin 1117 nəfəri (15.46 faizi) 200 və daha yüksək bal toplamış, 6107 nəfər 0-200 bal intervalında nəticə əldə etmişdir ki, bu da iştirakçıların 84.54 faizi deməkdir. 2 nəfər 600-dən yuxarı bal toplayıb, maksimal nəticə 614 bal olmuşdur.

III ixtisas qrupu üzrə imtahanda 7812 nəfər iştirak etmişdir. İştirakçıların 1934 nəfəri (24.76 faizi) 200 və daha yüksək bal toplamışlar. Beləliklə, 5878 nəfər 0-200 bal intervalında nəticə əldə etmişdir ki, bu da iştirakçıların 75.24 faizi deməkdir. Bu qrupda 600-dən yuxarı bal toplayanların sayı isə 10 nəfər olub və maksimal nəticə 680 baldır.

IV ixtisas qrupu üzrə imtahanda 2094 nəfər iştirak etmiş, onların cəmi 235 nəfəri (11.22 faizi) 200 və daha yüksək bal toplamışlar. Beləliklə, 1859 nəfər 0-200 bal intervalında nəticə əldə etmişdir ki, bu da iştirakçıların 88.78 faizi deməkdir. 600-dən yuxarı bal toplayanların sayı isə 10 nəfər olub və maksimal nəticə 670 baldır. Oxunub (630) dəfə

Pin on PinterestShare on LinkedInTweet about this on TwitterShare on Google+Share on Facebook


free hits
Track My Website