BDU tələbələri “Tələbə plus” kartlarının ilk istifadəçiləri oldular

Bakı Dövlət Universitetində (BDU) ilk “Tələbə plus” kartları universitetin ən yüksək bal toplayan 14 tələbəsinə təqdim edilib. 

“Azərbaycan müəllimi” xəbər verir ki, tədbirdə Bakı Dövlət Universitetinin rektoru Elçin Babayev, Təhsilin İnkişafı Fondunun İdarə Heyətinin sədri Elnur Nəsibov, “Kapital Bank”ın Korporativ satışlar departamentinin direktoru Qara Əbdülrəhmanov, ”Visa”nın Azərbaycan üzrə ölkə meneceri Nurlan Hacıyev, tələbə və müəllimlər iştirak ediblər.

Elçin Babayev Təhsilin İnkişafı Fonduna təşəbbüsə və təşəbbüsün qısa müddətdə reallaşdırıldığına görə təşəkkür edib. Rektor tələbələri təbrik edərək bildirib ki, “Tələbə plus” kartlarının ilk növbədə universitetin ən yüksək bal toplayan tələbələrinə təqdim edilməsi onlar üçün stimuldur: “Bu da göstərir ki, zəhmətiniz hədər getməyib. Kartları ilk sizin almağınız özü də sizə verilən dəyərdir”.

Təhsilin İnkişafı Fondunun İdarə Heyətinin sədri  Elnur Nəsibov bildirib ki, 1 ildən artıqdır üzərində çalışdıqları layihə artıq reallaşıb: “Bu il ali təhsil alanların sayı 250 min nəfər olub. Bunu nəzərə alaraq 250 min tələbə üçün tələbə kartları gətiriləcək. Növbəti mərhələdə bu, peşə və orta ixtisas təhsilinə də şamil ediləcək”.

E.Nəsibov imtiyaz və güzəştlər verən kartın növbəti tədris ilində təhsil sahəsində çalışan əməkdaşlara da şamil ediləcək.

İndiyədək pərakəndə satış, geyim, yemək, qida və s. sahələr üzrə 200-dən artıq şirkətlə razılığın əldə olunduğunu deyən E.Nəsibov “Tələbələrin ən çox müraciət etdikləri yerlərdə güzəşt və imtiyazların, keşbək və endirimlərin olmasına nail olmuşuq. 10-12 gün əvvəl Mədəniyyət Nazirliyi ilə də müqavilə imzalanıb və mədəniyyət obyektləri, muzeylər, sərgi salonlarından istifadə üçün güzəştlərə nail olunacaq”, - deyib. 

E.Nəsibovun sözlərinə görə, “Tələbə plus” 20-yə yaxın təlim tədris mərkəzi, kurslarda 20 faiz endirim verəcək. “Araz” marketlər şəbəkəsi ilə danışıqlar aparılır. Burada da 5 faizədək endirimlərin olacağı gözlənilir. Gələcəkdə idman, fitness, turizm, səhiyyə, nəqliyyat sahələrində də xidmətlərin əlavə edilməsi üçün danışıqlar gedir. Nəqliyyat – yerüstü, yeraltı, şəhərdaxili, şəhərlərarası nəqliyyat vasitələrini də əhatə edəcək endirim və güzəştlər də gözləniləndir.

E.Nəsibov tədbirdə “Tələbə plus” kartının şüarını da açıqlayıb: “Tələbə olmaq üstünlükdür” şüarı ilə istəyirik ki, tələbə olmağın üstünlük olduğunu vurğulayaq”.

“Kapital bank”ın korporativ satışlar departamentinin direktoru Qara Əbdülrəhmanov təhsilin bankın korporativ sosial fəaliyyətinin əsas istiqamətlərindən biri olduğunu vurğulayıb: “Hazırda təhsil alan tələbələr ölkənin gələcək inkişafında mühüm rol oynayacaqlar. Bu kontekstdən yanaşdıqda layihə bank üçün də böyük dəyər kəsb edir. Bu layihəyə qoşulmaqla tələbələrimizə xidmət göstərməyə hazır olduğumuzu bildirmək istəyirik”.

“Visa”nın ölkə üzrə meneceri Nurlan Hacıyev təmsil etdiyi şirkətin fəaliyyətinə diqqət çəkib, rəqəmsal ödənişlərdə “Visa”nın dünya lideri olduğunu deyib. Son 5-10 il ərzində Azərbaycanın böyük inkişaf yolu keçdiyini vurğulayaraq, ölkənin artıq strateji bazarlardan birinə çevrildiyini, rəqəmsal ödənişlərin burada da həyatın vacib reallığı olduğunu deyib: “Rəqəmsal Azərbaycan” Azərbaycan strategiyasıdır və biz sizinlə birlikdə rəqəmsal Azərbaycanı qurmalıyıq. Bu baxımdan Təhsilin İnkişafı Fondu, “Kapital bank”, “Visa” çalışacaq ki, “Tələbə plus” maksimum imtiyazlar yaratsın, sizin tələbatınıza uyğun formalaşsın və ən yaxşı məhsullardan biri olsun”.“Tələbə Plus” kartının ilk istifadəçisi olan 14 yüksək ballı tələbədən biri “Hüquqşünaslıq” ixtisası üzrə I kurs tələbəsi Məhəmməd Qasımov çıxış edərək, bu layihəyə görə təşəkkür edib: “Bura gəlib çatmaq əziyyətlə olub və burada bizə dəyər verildiyini görmək xoş hissdir. Gələcək fəaliyyətimiz, karyera istiqamətində inkişafımız üçün bu kartın verdiyi əlavə imkanlara görə təşəkkür edirəm”.