BDU komandası Çində keçirilən startap yarışmasının qalibi olub

26 oktyabr – 3 noyabr 2024-cü il tarixlərində Çin Xalq Respublikasının Xian şəhərində "Belt and Road” Beynəlxalq universitetlərarası startap yarışması keçirilib.

Universitetdən “Azərbaycan müəllimi”nə verilən məlumata görə, yarışma Çinin Xian Jiaotong Universiteti (XJTU) və İpək Yolu Universitet İttifaqı (University Alliance of the Silk Road - UASR) tərəfindən təşkil olunub. Tədbirdə Yaponiya, İngiltərə, Türkiyə, Rusiya, Yeni Zelandiya, Qazaxıstan, Özbəkistan və s. ölkələrdən 14 komanda və Çin Xalq Respublikasından 22 komanda “Yaşıl texnologiyalar”, “Elmi innovasiya”, “Rəqəmsal texnologiyalar” və “Səhiyyə texnologiyaları” kateqoriyaları üzrə yarışıb.

"Belt and Road” Beynəlxalq universitetlərarası startap yarışmasında Azərbaycanı təmsil edən yeganə komanda Bakı Dövlət Universitetinin (BDU) “DAIGNOSIS” komandası olub. BDU komandası yarışmada tibbdə süni intellektin tətbiqinə dair layihə ilə çıxış edib. Layihə həkim və xəstələri onlayn platformada bir araya gətirən mobil tətbiqdir. Mobil tətbiq daxilində ilkin simptomlara əsasən, süni intellekt tərəfindən xəstələrə ilkin diaqnozun qoyulması, xəstəliyə ən uyğun həkimlərin seçilməsi, onlayn ilkin konsultasiyanın təşkili nəzərdə tutulub.