Nazir: Hədəfimiz məktəbəqədər təhsilə əlçatanlığın 50 faizə çatmasıdır

Məktəbəqədər təhsilin əlçatanlığı və keyfiyyətinin artırılması sahəsində aparılan işlər daha da prioritetləşdirilməlidir.

“Azərbaycan müəllimi” xəbər verir ki, bunu elm və təhsil naziri Emin Əmrullayev bu gün keçirilən “Məktəbəqədər təhsildə keyfiyyətə yeni baxış” adlı II beynəlxalq konfransda çıxışı zamanı deyib.

Onun sözlərinə görə, təhsilin ən vacib pillələrindən biri olan məktəbəqədər təhsillə bağlı  müzakirələr təhsil siyasəti ilə məşğul olan həmkarların təcrübə və biliklərinin artmasına müsbət təsir göstərir.

“İnsan hər zaman öyrənir və bir-birindən öyrənmək çox qiymətli bir təcrübədir” deyən nazir əlavə edib ki, son illər Azərbaycanın əsas hədəflərindən biri məktəbəqədər təhsilin əlçatanlığını təmin etməkdir. Çünki tarixən Azərbaycanda məktəbəqədər təhsilin əlçatanlığı aşağı səviyyələrdə olub. Hazırda hədəfimiz 2026-cı ilə qədər hər iki uşaqdan birinin (yəni 1-5 yaş arası uşaqların 50%-nin) məktəbəqədər təhsillə əhatə olunmasıdır. Bu, olduqca ambisiyalı və tarixi bir hədəfdir, çünki indiyə qədər bu göstəriciyə yaxınlaşa bilməmişik”.

Emin Əmrullayev əlavə edib ki, keçmişə nəzər salsaq, sovet dövründə belə məktəbəqədər təhsillə əhatə olunma səviyyəsi 10, 15, ən yaxşı halda 20% civarında olub. Hətta bəzi bölgələrimizdə bu göstərici cəmi bir neçə faizlə ifadə edilirdi:

“Buna görə də məktəbəqədər təhsilin əlçatanlığı və keyfiyyətinin artırılması sahəsində aparılan işlər daha da prioritetləşdirilməlidir. Ümumtəhsil sisteminin keyfiyyəti ilə bağlı olan problemləri də təhsilin bu mühüm pilləsində həll etməyə çalışmalıyıq”.