“Uğur körpüsü”ndən keçənlər: Məktəb direktorları təcrübələrini paylaşırlar

Xızı rayonu üzrə təhsil müəssisələrində tədrisin keyfiyyətinin və şagird nailiyyətlərinin artırılması, buraxılış imtahanları, müxtəlif olimpiada və müsabiqələr üzrə nəticələrin yaxşılaşdırılması məqsədilə Abşeron-Xızı Regional Təhsil İdarəsi tərəfindən "Uğur körpüsü" layihəsinə start verilib.

Layihə çərçivəsində Sumqayıt şəhəri üzrə nümunəvi ümumi təhsil müəssisələri ilə Xızı rayonunun ümumi təhsil müəssisələrinin fəaliyyətinin əlaqələndirilməsi üçün qabaqcıl pedaqoji heyətinin təcrübəsinin Xızı məktəblərində tətbiqinə başlanılıb. 

Təcrübə mübadiləsində Sumqayıt şəhər Təbiət Elmləri Təmayüllü Gimnaziya, Texniki və təbiət elmləri liseyi və 23 nömrəli tam orta məktəbin rəhbərləri və pedaqoji heyəti iştirak edirlər.

“Azərbaycan müəllimi” olaraq “Uğur körpüsü” layihəsində iştirak edən məktəb rəhbərləri ilə görüləcək işlər barədə söhbət etdik.

“Xızı məktəblərinin zəif göstəriciləri regionun ümumi nəticələrinə mənfi təsir edir”

Abşeron-Xızı Regional Təhsil İdarəsinin bu təşəbbüsünü alqışlayan Sumqayıt şəhəri Nizami Gəncəvi adına Texniki və təbiət elmləri liseyinin direktoru, Əməkdar müəllim Rüxsarə Məmmədova bildirir ki, bu regionun təhsil müəssisələri 9 və 11-ci siniflərin son buraxılış imtahanlarının, eləcə də ali məktəblərə qəbul imtahanının nəticələrinə görə ölkədə birincilik əldə edib. Lakin Sumqayıt və Abşeron məktəblərinin nəticələri yüksək olduğu halda, Xızı rayonunun məktəblərinin zəif göstəriciləri regionun ümumi nəticələrinə mənfi təsir edir. Layihənin məqsədi regionun nəzdində olan məktəblər arasında uğur körpüsü yaratmaq, bir qədər ucqar yerlərdə yerləşən məktəblərin nəticələrini Sumqayıt və Abşeron məktəblərinin nəticələrinə yaxınlaşdırmaqdır: “Ümumilikdə bu layihə Abşeron-Xızı Regional Təhsil İdarəsinin nailiyyətlərinin daha da yüksəldilməsinə xidmət edir. Belə olduğu halda idarənin tabeliyində olan bütün  ümumi təhsil müəssisələrinin nəticəsi yüksək olacaq. Şəhərimizin təcrübəsi zəngin olan məktəb rəhbərləri “Uğur körpüsü”  layihəsində iştirak edilməyə dəvət olunublar. Çox qürurvericidir ki, mən də onlardan biriyəm. Biz məktəb direktorları olaraq Təhsil İdarəsinin əməkdaşları ilə birlikdə Xızı rayonunun müxtəlif ümumi təhsil müəssisələrinə səfər etdik, məktəb rəhbərləri, pedaqoji kollektiv və şagirdlərlə tanış olduq. Əlaqələrimiz möhkəm əməkdaşlığa çevrilərsə, həm onlar, həm biz işbirliyindən yararlanaraq yüksək nəticə əldə edəcəyik”.

Sumqayıt şəhərinin 3 ümumi təhsil müəssisəsinin hər birinin ayrılıqda Xızı rayonunun 4-5 məktəbi ilə əməkdaşlıq edəcəyini qeyd edən R.Məmmədova layihə çərçivəsində görüləcək işlər haqqında məlumat verir: “Rəhbərlik etdiyim Nizami Gəncəvi adına Texniki və təbiət elmləri liseyinin pedaqoji kollektivi Xızı rayonunun Türkoba, Baxışlı, Tıxlı, Xələc ümumi və Fındığan tam kənd orta məktəbləri ilə işbirliyinə başlayıb. Bu məktəblərin hər biri yüksək şəraitə və maddi-texniki bazaya sahibdir. Məktəblərin kadr potensialı yaxşıdır, orada MİQ yolu ilə Xızı rayonuna təyinat alan müəllimlər, direktorların işə qəbulu müsabiqəsində yüksək nəticə göstərmiş məktəb rəhbərləri çalışırlar. Sumqayıt, Bakı şəhərlərindən xeyli sayda gənc müəllim Xızı məktəblərində işləyir. Xızıda səfərdə olarkən şahid olduq ki, rayonlarımızda necə gözəl məktəblər tikilib. Orada çox yaxşı şəraiti olan modul tipli məktəblər gördük. Sadəcə olaraq, mühit, regionun özünəməxsus adət-ənənələri, qız övladlarının oxumağına önəm verilməməsi göstəricilərə mənfi təsir edir. Ümidvaram ki, əməkdaşlığımız onlara bir motivasiya olacaq və şagird nailiyyətlərində tədricən yüksək nəticə əldə ediləcək. Məktəb direktorları olaraq fəaliyyət planı hazırlamışıq. Əməkdaşlıq çərçivəsində buraxılış imtahanlarında, müxtəlif bilik yarışmalarında, Respublika fənn olimpiadalarında Xızı məktəblilərinin fəal iştirakını təmin edəcəyik. Şagirdlərin bilik səviyyəsini öyrənmək məqsədilə vaxtaşırı monitorinqlər keçirərək buraxılış imtahanında yüksək nəticə əldə edilməsinə nail olacağıq. Çalışacağıq ki, tək bilik yarışmalarında deyil, yaradıcılıq tələb edən müxtəlif müsabiqələrdə də Xızı şagirdlərinin iştirakını təmin edək, onların hərtərəfli inkişafına şərait yaradaq. Hazırladığımız fəaliyyət planında müəllimlərin metodiki hazırlığı, onlayn olaraq liseydə keçirilən dərslərə qatılması, təlimlərin keçirilməsi, sadaladığım məktəblərdən şagirdlərin bir qisminin liseyimizə gətirilməsi, onların burada keçilən dərslərdə iştirakını təmin etmək nəzərdə tutulub. Müəllimlərimizin həmin məktəblərdə açıq dərslərini təşkil etməyi planlaşdırırıq. Onlar bizim müəllimlərin dərsləri haqqında öz fikirlərini deyəcəklər, müzakirə zamanı fikir mübadiləsi aparılacaq, tövsiyələr irəli sürüləcək. Buraxılış imtahanlarına hazırlıq, fənn olimpiadaları, bilik yarışmaları, yaradıcılıq sərgiləri ilə bağlı müəyyən işlərin görülməsi nəzərdə tutulub”.

40 ildən çox  məktəb rəhbəri kimi fəaliyyət göstərən Rüxsarə müəllimə hesab edir ki, qarşılıqlı əməkdaşlıq mütləq fayda verəcək: “Diaqnostik qiymətləndirmədən sonra liseyimizdə bütün siniflərdə monitorinqlərə başlamışıq. Gələn həftə bu prosesi Xızı rayonunun sadaladığım məktəblərində həyata keçirməyi planlaşdırırıq. Bu layihə bizim üçün bir imtahandır. Sual yaranır ki, əməkdaşlığımız həmin məktəblərdə nəyi dəyişəcək? Hansı uğurlu nəticələr əldə olunacaq? Belə bir təşəbbüs üçün İlhamə Abdullayeva başda olmaqla, Abşeron-Xızı Regional Təhsil İdarəsinin bütün əməkdaşlarına təşəkkür edirəm”. 

“Buraxılış imtahanlarında “2” alanların sayı azalarsa, demək, işimizin müsbət tərəfləri olacaq” 

Sumqayıt şəhər Təbiət Elmləri Təmayüllü Gimnaziyanın direktoru, Əməkdar müəllim Nizami Əhmədov rəhbərlik etdiyi təhsil müəssisəsinin uğurlu təcrübəsini bölüşməyə hər zaman hazır olduqlarını qeyd edir: “Sevindirici haldır ki, liseyimiz “Uğur körpüsü” layihəsində iştirak edən təhsil müəssisələrindən biridir. Biz Xızının 4 təhsil müəssisəsi - Yeni Yaşma kənd, M.Müşfiq adına Giləzi qəsəbə, M.A.Dadaşzadə adına Şorabad qəsəbə, A.Abdullayev adına Altıağayc qəsəbə tam orta məktəbləri ilə əməkdaşlıq edəcəyik. Liseyimizin nümayəndə heyəti ilə 2 dəfə həmin məktəblərdə olmuşuq və fikir mübadiləsi aparmışıq. Qeyd olunduğu kimi, bu məktəblərdə çox gözəl şərait mövcuddur. Lakin ucqar məktəblərdə işləməyə az sayda müəllim gedir. Şəhərlərdən imtahan yolu ilə Xızı məktəblərində işləməyə təyinat alan müəllimlər yolun uzaqlığını və çətinliyini nəzərə alaraq dərsdən sonra müəyyən işlər görə bilmirlər. Qeyd etdiyim məktəblərin şagirdləri 2023-2024-cü tədris ilində keçirilmiş buraxılış imtahanlarında çox aşağı nəticələr əldə ediblər. Oktyabrda iki dəfə Xızı məktəblərinə səfər etdim, məktəblərin hər birinə buraxılış imtahanlarına hazırlaşmaq üçün 250 kitab hədiyyə edim. Həmin məktəblərdə daha çox riyaziyyat üzrə göstəricilər zəif olduğu üçün riyaziyyat, eyni zamanda fizika, kimya fənləri üzrə vəsaitlərə üstünlük vermişik. 5, 6, 7, 8-ci sinif şagirdlərini yoxlamaq üçün testlər toplusu də aparmışdım. Biz bacardığımız qədər Xızı məktəblərinə kömək etməyə hazırıq”. 

Son 2-3 ildə Xızı rayonundan heç bir məktəblinin fənn müsabiqəsi, olimpiada qalibi olmadığını bildirən lisey rəhbəri deyir: “Gələcəkdə əməkdaşlıq etdiyimiz məktəblərin şagirdləri fənn olimpiadaları və müsabiqələrin qalibi olarsa, buraxılış imtahanlarında “2” alan şagirdlərin sayı azalarsa, demək, işimizin müsbət tərəfləri olacaq. İnanırıq ki, ayda ən azı, iki dəfə Xızı müəllimlərini bizim müəllimlərlə görüşdürməklə, açıq dərslər, təlimlər təşkil etməklə müəyyən uğurlar əldə biləcəyik. “Uğur körpüsü” layihəsində örnək olacaq məqamlar çoxdur və inanıram ki, cari tədris ilinin sonunda əməkdaşlığımızın bəhrəli nəticəsini sizinlə bölüşəcəyik”. 

“Nəticələrin birdən-birə yüksələcəyini gözləmək düzgün deyil”

Sumqayıt şəhər 23 nömrəli tam orta məktəbin direktoru Reyhan Yunisova bildirir ki, oktyabrda Abşeron-Xızı Regional Təhsil İdarəsi tərəfindən bu uğurlu layihədə iştirak üçün dəvət alıblar: “Müəllimlər öyrədənlərdilər, düşünürəm ki, “Uğur körpüsü” layihəsi çərçivəsində  pedaqoji əməkdaşlıq təhsildə mütləq müsbət nəticələrə gətirib çıxaracaq. Layihə Abşeron-Xızı regionunun təhsili üçün yeni nəfəsdir. İlk olaraq, nədən başlamalıyıq? Əlbəttə, əvvəlcə müəllim, məktəb rəhbərliyi olaraq bir-birimizi tanımalıyıq. Təhsil İdarəsinin əməkdaşları ilə birlikdə Xızı rayonunda görüşlər keçirdik. 23 nömrəli tam orta məktəb Xızının 4 təhsil müəssisəsi - R.İsmayılov adına Xızı şəhər tam orta məktəbi, C.Novruz adına Sitalçay 1 nömrəli tam orta məktəbi, N.Allahverdiyev adına Sitalçay kənd tam orta məktəbi və Ağdərə kənd ümumi orta məktəbi ilə əməkdaşlıq edəcək. Xızıya səfərim çərçivəsində bu məktəblərin rəhbər və şagirdləri ilə görüşdüm, təcrübəmizi bölüşdüm. Bölgələrdə olduğumuz zaman müəllim-şagird, rəhbərlik-müəllim münasibətlərinə diqqət yetirdim. Hesab edirəm ki, pedaqoji sahədə əməkdaşlığımız cəmiyyətdə müəllimlərin qarşılıqlı əlaqələrinə daha müsbət göstərəcək. Bölgədəki şagirdləri gördükdən sonra belə bir düşüncə yaranır ki, mən bu məktəbdə fəaliyyətə başlasaydım, necə addım atardım? Həmin məktəblərin direktorları ilə söhbət edərkən bu mövzuya da toxunmuşam. Təbii ki, hər bir uğurlu nəticə haradansa başlayır. Hesab edirəm ki, həmin məktəblərdə müxtəlif müsabiqələrin qalibi ola biləcək şagirdlər var”. 

Reyhan müəllim şagirdlərin zəif nəticə göstərməsinin səbəbini həm də şagirdlərin evdə böyüklərə müəyyən təsərrüfat işlərində kömək etdikləri üçün dərslərə az vaxt ayırmasında görür: “Yaxın zamanda müəllimlərimizlə birlikdə həmin məktəblərə yenidən səfər etməyi planlaşdırırıq. Məktəb rəhbərlərinin diqqət edə bilmədiyi elə səbəblər ola bilər ki, müəllimlər bir-biriləri ilə daha yaxın əməkdaşlıq etsələr, onları üzə çıxara, vəziyyəti daha detallı şəkildə öyrənə bilərlər. Baş çəkdiyimiz təhsil müəssisələrinin müəllim və şagirdlərini qonaq qismində məktəbimizə dəvət etmişik. Məqsədimiz, ilk növbədə, buraxılış imtahanlarında uşaqların nəticələrini yüksəltməkdir. Daha sonra onların fənn müsabiqələrində uğurlu iştirakını təmin etmək və digər sahələrdə istedadlı uşaqları aşkar edərək üzə çıxarmaqdır. Təbii ki, nəticələrin birdən-birə yüksələcəyini gözləmək düzgün deyil. Nəzərə çarpan ilkin dəyişikliklər əməkdaşlığın səmərəliliyini sübut edəcək”.