Musiqi müəllimlərinin attestasiyası necə təşkil olunacaq? – Əsas sualların cavabları

Musiqi, incəsənət məktəb və mərkəzlərində çalışan müəllimlərin qiymətləndirməsinin keçirilməsi ilə bağlı əsas suallara aydınlıq gətirilib.

"Azərbaycan müəllimi" xəbər verir ki, bu barədə mədəniyyət nazirinin müşaviri Cəsarət Valehov sosial şəbəkə hesabında paylaşım edib.

- Müəllimlərin bilik və bacarıqlarının qiymətləndirilməsində əsas məqsəd nədir?
- Mədəniyyət Nazirliyinin tabeliyindəki təhsil müəssisələrində çalışan müəllimlərin peşə səriştə və bacarıqlarının ölçülməsi, ixtisasına, sənətinə müvafiq olaraq onların tutduğu vəzifəyə uyğunluğunun müəyyənləşdirilməsi və optimal müəllim heyətinin formalaşdırılması məqsədilə qiymətləndirmənin keçirilməsi nəzərdə tutulur. 

- Hansı müddətdə və mərhələdə bu prosesin keçirilməsi planlaşdırılır?
- Ümumilikdə ölkə üzrə 2025-2026-cı illər ərzində bu prosesin keçirilməsi planlaşdırılır. İlk mərhələdə fortepiano və musiqi nəzəriyyəsi ixtisasları, daha sonra digər ixtisaslar üzrə bu proses aparılacaq.

- Qiymətləndirmə prosesi ilə bağlı hansı sənədləşmə işləri aparılmalıdır?
- Mövcud qanunvericiliyə uyğun olaraq, Azərbaycan Respublikasının Mədəniyyət Nazirliyi yuxarı orqan kimi attestasiyanın qanunvericiliyə uyğun keçirilməsinə dair rəhbərliyi təmin edir və nəzarəti həyata keçirir. Qaydalara uyğun olaraq attestasiyanın konkret müddətləri və keçirilmə qaydaları, attestasiyanın keçirilməsi nəzərdə tutulan təqvim ilinin (2025-ci il) başlanmasına qədər məktəb rəhbərliyi tərəfindən təsdiq edilməlidir.

- Qiymətləndirmənin keçirilməsi ilkin olaraq hansı regionlar üzrə və nə vaxt nəzərdə tutulur?
- İlk olaraq, 2025-ci ilin fevral ayı ərzində Bakı Şəhər Mədəniyyət Baş İdarəsinin və Abşeron-Xızı Regional Mədəniyyət İdarəsinin tabeliyində olan məktəblərdə, həmçinin Qara Qarayev adına Mərkəzi İncəsənət Məktəbində  fəaliyyət göstərən müəllimlərin attestasiyadan keçirilməsi nəzərdə tutulur. Daha sonra Mil-Muğan, Şirvan-Salyan və Quba-Xaçmaz  bölgələrinin musiqi və incəsənət məktəblərində çalışan müəllimlərin bilik və bacarıqlarının dəyərləndirilməsi aparılacaq.

- Attestasiya komissiyası necə formalaşdırılacaq?
- Qanunvericiliyə uyğun olaraq, komissiyanın 1 üzvü Həmkarlar İttifaqı Komitəsindən, digər 4 üzv isə müstəqil ekspert qismində ixtisaslı qurumlardan cəlb ediləcəkdir.

- Attestasiyada iştirak edən müəllim üçün nə qədər müddətin ayrılması nəzərdə tutulub?
- Hər bir müəllim üçün 30 dəqiqəyədək müddət nəzərdə tutulacaq.

- İlk mərhələnin Bakı şəhərində hansı məkanda keçirilməsi nəzərdə tutulur?
- Bakı Xoreoqrafiya Akademiyasında keçirilməsi nəzərdə tutulmuşdur.

- Attestasiyanın hansı formada keçirilməsi nəzərdə tutulub?
- Attestasiyanın müsahibə formatında keçirilməsi nəzərdə tutulur. Attestasiya hər bir işçi ilə fərdi qaydada, praktiki ifaçılıq və nəzəri (sual-cavab) üsul ilə keçirilir.

-  Attestasiyanın proqramı olacaqmı və müəllimlərə veriləcəkmi?
- Hər bir ixtisas üzrə attestasiya proqramı hazırlanıb, qanunvericiliyə uyğun olaraq attestasiyanın başlanmasına 1 ay qalmışdan gec olmayaraq attestasiyanı keçməli olan müəllimlərə təqdim ediləcək. Məlumat üçün qeyd edim ki, proqram artıq Mədəniyyət Nazirliyinin rəsmi səhifəsində yerləşdirilib.