BMqT nümayəndəsi: “Azərbaycan iqlim savadılığına dair mühüm təkliflər irəli sürüb” 

COP29-da iştirak edənlər arasında məktəblilər, tələbələr və elmi-tədqiqatçılar da var. 

"Azərbaycan müəllimi" onların bir neçəsi ilə həmsöhbət olub.

İlk müsahibimiz olan Beynəlxalq Miqrasiya Təşkilatının (BMqT) nümayəndəsi Mariana Fernandes Bento portuqaliyalıdır.

O, Lissabon Nova Universitetində dillər və beynəlxalq münasibətlər üzrə bakalavr təhsili alıb, hazırda beynəlxalq və Avropa hüququ üzrə magistr təhsili alır.

Mariana deyir ki, bu, onun  iştirak etdiyi ilk COP tədbiridir. COP29-da olarkən çox təcrübə qazanıb:

 “COP29 mənim çoxtərəfli diplomatiya ilə bağlı ilk təcrübəmdir.  Danışıqlar hələ də gedir. Əslində, edə biləcəyimiz çox şeylər var, lakin tərəflər arasında uzlaşmada bəzi çətinliklər var. Biz iqlim keçidi ilə bağlı bir sıra tədbirlərdə olarkən bu sahədə çalışan bəzi insanlarla tanış olmuşuq. COP29-un əsas gündəliyi iqlim maliyyəsidir. Düşünürəm ki, iqlim maliyyəsi ilə yanaşı, iqlim təhsili də vacibdir. Azərbaycan iqlim savadılığına dair mühüm təkliflər irəli sürüb”. 

COP29-un daha bir iştirakçısı Eyslinn Patrik bu tədbirdə iştirak etməkdən böyük zövq aldığını deyib. 

Patrik tələbədir və COP29-da müşahidəçi kimi iştirak edir. 

O deyir ki, iqlim maliyyəsi ölkələr arasında böyük mübahisə mövzusudur:

“Buna baxmayaraq, düşünürəm ki, danışıqlardan sonra müsbət qərarlar qəbul olunacaq”.

O, COP tədbirində ilk dəfə iştirak etdiyini bildirib: 

“COP29-da bir sıra maraqlı pavilyonları ziyarət etmişəm. Burada bir çox gənclərlə müzakirələr aparmışıq”.

Eyslinn Patrik Bakıya heyran olduğunu vurğulayıb: “Bu şəhərin füsunkar memarlığı var. İstər CO29-un keçirildiyi məkanda, istərsə də şəhərdə gəzərkən insanları, xüsusilə yardımsevər və mehriban könüllüləri çox sevdim. Könüllülərin çoxu tələbələrdir, deyəsən, aralarında hətta məktəblilər də var”.

Biatris Şaklford da tələbədir. O, COP29-da müşahidəçi missiyasını yerinə yetirir.

O deyir ki, dünyanın hər yerindən insanlarla tanış olub, onlarla müzakirələr aparmaqdan çox məmnun qalıb.

Azərbaycana ilk dəfə gəldiyini söyləyən Biatris Şaklford ölkəmizin COP29-a hazırlığının heyrətamiz olduğunu bildirib: “COP29-da keçirilən panel müzakirələri çox bəyəndim. Xüsusən müzakirə iştirakçılarından nə istədiklərini eşitmək maraqlı idi. Burada gənclər üçün maarifləndirici tədbirlər keçirilir. Onların bu qlobal problemin həllindəki rolları müzakirə edilir. Panellərdə təhsilin əhəmiyyəti xüsusi vurğulanır. İnanıram ki, COP29-da iqlim probleminin həllinə yönələn konkret addımlar atılacaq”.