Təhsildə Keyfiyyət Təminatı Agentliyinin təşkilatçılığı ilə Mingəçevir Dövlət Universitetində 9 ali təhsil müəssisələrinin nümayəndələri üçün təlim keçirilib 

29 noyabr 2024-cü il tarixində Təhsildə Keyfiyyət Təminatı Agentliyinin (TKTA) təşkilatçılığı ilə Mingəçevir Dövlət Universitetində regionlarda fəaliyyət göstərən ali təhsil müəssisələrinin iştirakı ilə “XXI əsr təhsil çağırışları və tələbəyönümlü tədrisin təşkili” mövzusunda təlim keçirilib. Sözügedən təlimdə TKTA-nın İdarə Heyətinin sədri Tural Əhmədov, Agentliyin struktur bölmə rəhbərləri və əməkdaşları, həmçinin 9 ali təhsil müəssisəsinin - Mingəçevir Dövlət Universiteti, Azərbaycan Dövlət Aqrar Universiteti, Gəncə Dövlət Universiteti, Azərbaycan Texnologiya Universiteti, Azərbaycan Dövlət Pedaqoji Universitetinin (ADPU) Şəki filialı, Azərbaycan Dövlət Pedaqoji Universitetinin (ADPU)  Ağcabədi filialı, Azərbaycan Dövlət Pedaqoji Universitetinin (ADPU)  Şamaxı filialı, Bakı Dövlət Universitetinin Qazax filialı və Azərbaybaycan Dövlət İqtisad Universitetinin (UNEC) Zaqatala filialının  100 nəfərdən artıq   akademik və inzibati heyəti, media nümayəndələri iştirak edib.

Təlimin məqsədi regionlarda yerləşən ali təhsil müəssisələrinə  keyfiyyət təminatına dair faydalı məlumatların verilməsi, daxili keyfiyyət təminatı sisteminin formalaşmasına, müəssisələrdə keyfiyyət təminatı strukturunun işinin səmərəli təşkilinə və tədrisin tələbəyönlü prinsiplər əsasında qurulmasına dəstək olmaqdır.

Tədbiri giriş sözü ilə açan Mingəçevir Dövlət Universitetinin rektor əvəzi Üzeyir Zeynalov qonaqları salamlayaraq təlimin əhəmiyyətini vurğulayıb. Daha sonra çıxış edən  TKTA-nın İdarə Heyətinin sədri Tural Əhmədov tədbir iştirakçılarına XXI əsr təhsil çağırışları və tələbəyönümlü tədrisin təşkili ilə bağlı bir sıra vacib məqamlar haqqında ətraflı məlumat verib. Eyni zamanda, təlim çərçivəsində TKTA-nın məsul əməkdaşları adıçəkilən mövzu ətrafında geniş məruzə ilə çıxış ediblər.

Tədbirin sonunda təhsil müəssisələrinin daxili keyfiyyət təminatı sisteminin səmərəliliyinin qiymətləndirilməsi alətlərinin tələbləri və tətbiqi mexanizmi barədə iştirakçıların çoxsaylı sualları cavablandırılmış və xatirə fotosu çəkilmişdir.