Qarabağ Universitetinin tələbələri üçün “TGT nədir?” adlı maarifləndirici görüş keçirilib

Qarabağ Universitetinin tələbələri üçün Azərbaycan Tələbə Gənclər Təşkilatı İttifaqları tərəfindən (ATGTİ) “TGT nədir?” adlı maarifləndirici görüş keçirilib.

Universitetdən “Azərbaycan müəllimi”nə bildirilib ki, görüşün keçirilməsində məqsəd tələbələr arasında əlaqələrin gücləndirilməsi və onların təşkilatın fəaliyyəti barədə ətraflı məlumatlandırılmasıdır.

Tədbir Azərbaycan Respublikasının Dövlət Himninin səsləndirilməsi və ərazi bütövlüyümüz uğrunda canından keçən şəhidlərin xatirəsinin bir dəqiqəlik sükutla yad edillməsi ilə başlayıb.

Qarabağ Universitetinin İctimaiyyətlə əlaqələr və sosial məsələlər üzrə prorektoru Nərgiz İsmayılova tədbirdə açılış nitqi ilə çıxış edib. Nərgiz İsmayılova TGT ətrafında birləşməyin tələbə gənclər üçün əhəmiyyətini vurğulayaraq qeyd edib ki, bu cür təşkilatlar tələbələrin həm akademik, həm də sosial inkişafına böyük töhfələr verir. Prorektor, həmçinin universitet rəhbərliyinin tələbəyönümlü təşkilatlarla birgə əməkdaşlığa maraqlı olduğunu diqqətə çatdırıb.

Sonra ATGTİ-nin sədri Pərviz Mirələmli çıxış edərək təşkilatın fəaliyyət sahələri, məqsəd və vəzifələri barədə geniş məlumat verib. Pərviz Mirələmli TGT-nin universitet daxilində tələbələrin problemlərinin həlli, maraqlarının qorunması, eyni zamanda inkişafı üçün təşkil etdiyi müxtəlif layihələrdən və təşkilatın gələcək planlarından danışıb.

Tədbirdə tələbələrin təşkilatla bağlı sualları ətrafında geniş müzakirələr aparılıb.

Tədbirin yekununda ATGTİ-nin nümayəndələri Qarabağ Universitetinin rektoru Şahin Bayramovla görüşərək simvolik hədiyyə təqdim edib və xatirə fotosu çəkdiriblər.