AzMİU-nun rektoru Burkina Fasonun nümayəndə heyəti ilə görüşüb

COP29 tədbirləri çərçivəsində Azərbaycanda səfərdə olan Burkina Fasonun nümayəndə heyəti ilə Azərbaycan Memarlıq və İnşaat Universitetinin (AzMİU) rektoru, professor Gülçöhrə Məmmədova arasında görüş keçirib. 

Universitetdən “Azərbaycan müəllimi”nə verilən məlumata görə, nümayəndə heyətinə AzMİU-nun məzunu, hidrotexnik və kənd təsərrüfatı mühəndisliyi üzrə mütəxəssis Konate Moussa Dakianous rəhbərlik edib. Hazırda o, Burkina Fasoda fəaliyyət göstərən "Bureau d'Appui-Conseil et d'Ingénierie pour le Développement" (BACIDE) təşkilatının direktorudur.

Görüşdə Konate Moussa Dakianousa AzMİU-da təhsil aldığı dövrdəki qiymət kitabçası və tələbə bileti təqdim olunub. 

Görüş zamanı rektor Azərbaycanın işğaldan azad olunmuş ərazilərində aparılan bərpa-quruculuq işləri barədə məlumat verilib, bu işlərin dayanıqlı şəhərsalma və ekoloji çağırışlara uyğun şəkildə həyata keçirildiyi vurğulanıb. 

Görüşdə AzMİU-da son 30 il ərzində həyata keçirilmiş mühüm layihələr, universitetin inkişaf dinamikası və regionda mühəndislik təhsilində oynadığı aparıcı rol haqqında fikir mübadiləsi aparılıb. 

Görüşdən sonra nümayəndə heyəti Konate Moussa Dakianousun vaxtilə təhsil aldığı Su təsərrüfatı və mühəndis kommunikasiya sistemləri fakültəsinə baş çəkib. Görüş AzMİU-nun beynəlxalq əməkdaşlıq imkanlarının genişlənməsi və məzunları ilə əlaqələrin möhkəmləndirilməsi istiqamətində mühüm addımlardan biri kimi qiymətləndirilir.