LDU tələbələri Baytarlıq Elmi-Tədqiqat İnstitutunda kliniki-təcrübə dərsləri keçirlər

Sentyabrın 16-dan Lənkəran Dövlət Universitetinin (LDU) “Baytarlıq” fakültəsinin “Baytarlıq təbabəti” ixtisası üzrə təhsil alan V kurs tələbələri Azərbaycan Respublikası Kənd Təsərrüfatı Nazirliyi Baytarlıq Elmi-Tədqiqat İnstitutunda kliniki - təcrübə dərsləri keçirlər.

Universitetdən “Azərbaycan müəllimi”nə bildirilib ki, ötən müddət ərzində tələbələr institutun bütün laboratoriyaları ilə yaxından tanış olublar. İlkin təcrübəyə tələbələr institutun "Quş xəstəlikləri şöbəsi" laboratoriyasından başlayıblar. Baytarlıq Elmi-Tədqiqat İnstitutunun Quş xəstəlikləri şöbəsinin müdiri, istehsalat təcrübəsinin rəhbəri, aqrar.e.ü.f.d., dosent Mirzəmməd Həsənov tələbələrə innovativ texnologiyaların tətbiqi olaraq fittobiotik təsirli bitkilərin müxtəlif infeksion xəstəliklərinə qarşı müalicə-profilaktika üsulları, quşlarda kliniki müayinələr, patanatomik yarmanın aparılmasına dair elmi-praktiki təcrübə dərsləri keçir, praktik məşğələlər aparır.

LDU-nun V kurstələbələrinin hal-hazırda da institutun Arı və balıq xəstəlikləri, Baytarlıq Klinikası və heyvanların infeksion yoluxucu xəstəlikləri, Yoluxmayan daxili xəstəliklər, Parazitologiya, Quş xəstəlikləri, Virusologiya və Baytarlıq preparatlarının istehsalı və nəzarəti şöbələrində 2024-2025-ci tədris planına uyğun olaraq kliniki-təcrübə dərslərinin keçirilməsi davam edirlər.

Qeyd edək ki, tədris planına əsasən 16 sentyabr tarixindən başlanan təcrübə 15 həftə nəzərdə tutulur.