Dərnəklərin istedadlı məktəbliləri

Məktəblilərin asudə vaxtının səmərəli təşkili, onların zərərli vərdişlərdən uzaqlaşdırılması, fiziki aktivliyin yüksəldilməsi, sağlam həyat tərzinin təmin olunması məqsədilə ümumtəhsil məktəblərində dərsdən sonra müxtəlif dərnək və qruplar fəaliyyət göstərir. Təhsil müəssisələrində uşaq və gənclərin bilik və bacarıqlarını, yaradıcılıq qabiliyyətlərini inkişaf etdirmək üçün lazımi şərait yaradılır, dərsdən sonrakı vaxtlarda şagirdlər arzu və istəklərinə, maraq və meyillərinə uyğun olaraq yaradıcılıq və idman profilli dərnəklərə cəlb olunurlar. 

Ümumtəhsil məktəblərində “Yol hərəkəti qaydaları”, “Bədii qiraət”, “Rəqs”, “Rəsm”, “Məktəb teatrı”, “Əyləncəli fizika”, “İnformatika”, “İntellekt” və bir çox idman növləri üzrə xeyli sayda dərnək və qruplar fəaliyyət göstərir. Müxtəlif fənn müəllimləri bacarığı, istedadı olan şagirdləri qruplaşdıraraq onları müsabiqələrə, festivallara yönəldir, sərgilərini, tədbirlərdə çıxışlarını təmin edirlər. Müəllimlər valideynlərlə daim əlaqədə olur, onları övladlarının çox bacarıqlı olduğuna, uğurlu gələcəyinin olmasına inandırırlar. 

“Azərbaycan müəllimi” olaraq Sumqayıt şəhərində həmsöhbət olduğumuz istedadlı şagirdləri oxucularımıza təqdim edirik: 

“Arzum milli rəqslərimizi dünyada tanıtmaqdır”

Sumqayıt şəhər 24 nömrəli tam orta məktəbin 4-cü sinif şagirdi Leyla Məmmədova qiraətçidir və rəqslə məşğul olur: “3 ildir ki, şəhid Rüfət Mustafayev adına “Buta” rəqs dərnəyinə gedirəm. Müəllimim Nərgiz Ağayevanın sayəsində milli və xarici rəqsləri öyrənirəm. Milli rəqslərimizi çox sevirəm və bir çox festivallarda, tədbirlərdə uğurla çıxış etmişəm, diplomlara layiq görülmüşəm. Eyni zamanda Sumqayıt şəhərində yerləşən “Dostluq” Mədəniyyət evində “Bədii qiraət” dərnəyinin üzvüyəm və İlahə müəllimdən dərs alıram. Şeir deməyi, mahnı oxumağı xoşlayıram, tədbirlərdə, telekanallarda uşaq və bayram mövzularında verilişlərdə çıxış edirəm. Mən bu il Sumqayıt şəhərinin 75 illik yubileyinə həsr olunmuş “Əbədi gənc Sumqayıt” festival-müsabiqəsinin “Bədii qiraət” nominasiyasında 1-ci yeri qazanmışam. Həmçinin Sumqayıt şəhər Səid Rüstəmov adına 3 nömrəli Uşaq Musiqi Məktəbində fortepiano təhsili alıram. Bütün bunlarla yanaşı, məktəbdə də yaxşı oxuyuram və sinif rəhbərim Sara Abbasovanı çox istəyirəm. Nailiyyətlərimə görə atama, anama, müəllimlərimə təşəkkür edirəm. Arzum beynəlxalq festivallara qatılaraq milli rəqslərimizi bütün dünyada tanıtmaqdır”. 

“Dövlət səviyyəli tədbirlərdə şeirlər deyirəm, vətənpərvərlik mövzusunda mahnılar oxuyuram” 

Sumqayıt şəhər 29 nömrəli tam orta məktəbin 5-ci pilot sinfinin əlaçısı Əhməd Əhmədli  oxumağı çox sevdiyini deyir: “Mən şəhid Rüfət Mustafayev adına “Buta” rəqs dərnəyində rəqsə gedirəm. 4 ildən çoxdur ki, rəqslə məşğulam və bu illər ərzində çoxlu sayda tədbirlərdə çıxış edərək müxtəlif diplomlara layiq görülmüşəm. Eyni zamanda “Dostluq” Mədəniyyət evində müəllimim İlahə Hüseynovanın köməyi ilə “Bədii qiraət” dərnəyində şeir deməyi, ifadəli oxumağı, səhnə mədəniyyətini öyrənirəm. Dövlət səviyyəli tədbirlərdə, məktəb tədbirlərində, müxtəlif müsabiqələrdə, bayramlarda, hərbi hissələrdə keçirilən tədbirlərdə, televiziya proqramlarında fəal iştirak edirəm, şeirlər deyirəm, vətənpərvərlik mövzusunda mahnılar oxuyuram. Mən dərnəklərin məşğələlərinə sevə-sevə gedirəm. Bu ildən cüdo idman növü ilə də məşğul oluram”.