UNİCEF-in Azərbaycandakı nümayəndəsi: Qızların təhsilinə erkən yaşda investisiya qoyulması vacibdir

Qızların təhsilinə erkən yaşda investisiya qoyulması vacibdir.

“Azərbaycan müəllimi” xəbər verir ki, bunu UNİCEF-in Azərbaycandakı nümayəndəsi Saca Faruq Abdullah Ailə, Qadın və Uşaq Problemləri üzrə Dövlət Komitəsinin Elm və Təhsil Nazirliyi ilə əməkdaşlığı çərçivəsində Azərbaycan Uşaqlarının VI Ümumrespublika Forumunda çıxışı zamanı deyib.

O bildirib ki, qlobal daşqınlar, müəyyən hava şəraiti uşaqların təhsilinə müəyyən əngəllər yaradır: "Nazir Emin Əmrullayevin də qeyd etdiyi kimi, qızların təhsilinə erkən yaşda sərmayənin qoyulması vacibdir".

Nümayəndə əlavə edib ki, iqlim dəyişikliyi ilə bağlı xəstəliklərin 88 faizi 5 yaşından aşağı uşaqların payına düşür:

"İqlim problemləri yönündə maliyyənin cəmi 2,4 faizi uşaqlarla bağlı yaranan məsələlərin həllinə ayrılıb".

Onun sözlərinə görə, iqlim dəyişmələrinin ən çox diqqətdən kənar qalan məsələlərindən biri təhsilə təsirlə bağlıdır. Eyni zamanda, o, zalda əyləşən uşaqlara da mesajinın olduğunu deyib: “Fəal plan, ideya və təkliflərinizi ifadə edin. Bu sizin inkişafınıza müsbət təsir göstərəcək”.