İnşa Ədəbiyyat fənn kurikulumundan çıxarılır, esse əlavə edilir

“Kurikulumların təkmilləşdirilməsi həyati zərurətdir. Yaddaş məktəbindən təfəkkür məktəbinə keçidi sözdə deyil, əməldə reallaşdırmalıyıq. Yeni Ədəbiyyat fənn kurikulumu da məhz buna xidmət etməlidir”.

“Azərbaycan müəllimi” xəbər verir ki, bunu Təhsil İnstitutunun Ədəbiyyat fənn kurikulumu üzrə işçi qrupunun üzvü Bilal Həsənli bir neçə gün öncə “Ədəbiyyat fənninin məzmununda yeniliklər” mövzusunda keçirilən vebinarda deyib.

O bildirib ki, kurikulum təkmilləşdirilən zaman yeni anlayışlar əlavə edilib. Anlayışlar səviyyəsində yeni kurikulumda “inşa” terminindən istifadə edilməyib. Yeni tədris proqramında əsas yazı işləri 5-11-ci siniflərdə esselər üzərində qurulacaq:

“İndi dərsliklərdə inşaya şərait yaradan hazır biliklər yoxdur. Əvvəlki dərsliklərdə əsərin mövzusu, ideyası, bədii xüsusiyyətləri, surətlər öz əksini tapırdı. Şagirdin də vəzifəsi həmin inşada mənimsədiyi bilikləri əks etdirməkdən ibarət idi. Amma esse şagirddən mövzuya, qoyulan problemə yaradıcı münasibət tələb edir. Beynəlxalq təcrübədə publisistik mətnlər fənn kurikulumunda əksini tapıb, lakin mövcud proqramda yox idi”.

Bilal Həsənli yeni tədris proqramında həmçinin dərsin strukturuna yaradıcı yanaşıldığını qeyd edib. Beynəlxaq təcrübədə özünü doğruldan metoddan istifadə edildiyini deyib:

“Yeni proqramda dərs strukturunda şagirddə mövzuya maraq oyatma ilkin mərhələdir. Bu, təkcə şifahi şəkildə aparılmamalı, əyanilik üçün müxtəlif texnologiyalardan istifadə edilməlidir. Sonrakı mərhələlərə araşdırma, izahetmə, möhkəmləndirmə, qiymətləndirmə aiddir. Formativ, summativ və diaqnostik qiymətləndirmə formaları olduğu kimi saxlanılıb”.