Venerada Yerdəki kimi həyat olub?

Atmosferdə aparılan tədqiqatlar Venerada heç vaxt Yerdəki kimi həyatın olmadığını göstərir.

“Azərbaycan müəllimi”nin məlumatına görə, tədqiqatlar zamanı planetin daxili hissəsinin quru olması əvvəllər bu planetin yaşamaq üçün yararlı olduğu ilə bağlı nəzəriyyələrlə uyğunlaşmadığını göstərir.

Qurğuşunu əritməyə kifayət edəcək qədər isti bir səthə və sulfat turşusu buludlarına sahib olan Venera çox vaxt Yerin “əkizi” adlandırılsa da, Yerlə dünyalar qədər fərqli bir planetdir. Bəzi alimlər Veneranın “qonaqpərvər” bir planet olduğuna, daha soyuq temperaturlara və maye su okeanlarına ev sahibliyi etdiyinə inanırdılar. Ancaq indi tədqiqatçılar Veneranın bizim bildiyimiz kimi canlıların yaşadığı bir planet olması fikrinə zərbə vurdular.

Alimlər deyirlər ki, planetin atmosferinin təhlili Veneranın içinin quru olduğunu üzə çıxarıb və bu, heç vaxt həyatın başlaması üçün zəruri hesab edilən maye su okeanlarının olmadığını göstərir. Kembric Universitetindən tədqiqatın ilk müəllifi Tereza Konstantinou bildirib ki: “Burada həyat ehtimalı tamamilə istisna edilmir. Sadəcə Yerə bənzər həyatın mövcudluğu istisna edilir”.

Veneranın nə vaxtsa yaşamaq üçün yararlı olub-olmadığı və hələ də onun turşu buludlarında həyatın ola biləcəyi sualı elm adamları arasında çoxdan aktual mövzu olub. Bəziləri planetin bir zamanlar Yerə daha çox bənzədiyini, lakin kontroldan çıxan istixana effektinə (istixana effekti günəşin istilik enerjisinin xeyli hissəsinin yer üzərində tutulmasına deyilir – red.) məruz qaldığına inanırlar. Digərləri isə Venerada heç vaxt yaşamın olmadığına inanırlar.

Konstantinou qeyd edib ki, Veneranın yaranmasının başlanğıcında planet nəhəng maqma dənizi ilə örtülmüşdü. Əgər o, tez soyusaydı, su qatılaşaraq su okeanlarını əmələ gətirərdi. Bununla belə, bu proses eyni zamanda maqma kristallaşdıqca suyun saxlanmasına səbəb olardı, yəni planetin daxili hissəsi su ilə zəngin olardı. Nəticədə, vulkanlar püskürəndə su ayrılacaqdı.

“Yerdəki vulkan partlayışlarının hər hansı bir fotosuna baxsanız, belə böyük dalğalanan buludların çıxdığını görərsiniz. Bunun da böyük bir qismi sudur”, - deyə o bildirib.

Lakin maqma yavaş-yavaş soyusaydı, su atmosferə buxar kimi düşərdi. Bu zaman su planetin daxili hissəsində qapalı qalmayacaqdı.

Constantinou və həmkarları “Nature Astronomy” jurnalında planetin iç hissəsindəki suyun tərkibini işıqlandırmaq üçün atmosferin kimyasını necə öyrəndikləri haqqında məlumat veriblər.