ADNSU-da insan alverinə qarşı mübarizə mövzusunda maarifləndirici tədbir keçirilib

Dekabrın 8-də Azərbaycan Dövlət Neft və Sənaye Universitetində (ADNSU) tələbələr üçün insan alverinə qarşı mübarizə mövzusunda maarifləndirici tədbir keçirilib.

"Azərbaycan müəllimi" xəbər verir ki, tədbirin məqsədi gənclər arasında insan alveri ilə bağlı məlumatlılığı artırmaq, onları potensial risklər və mübarizə üsulları barədə məlumatlandırmaq olub.

Tədbirdə İnsan Alveri Qurbanlarının Yardım Mərkəzinin rəhbəri Həbibə Qəribova və mərkəzin əməkdaşı Sabrina Qurbanova çıxış ediblər. Qonaqlar insan alverinin növləri, qurbanların üzləşdiyi təhlükələr, cəmiyyətin və dövlət qurumlarının bu sahədə gördüyü işlər haqqında ətraflı məlumat veriblər. Bildirilib ki, insan alverinə qarşı mübarizənin yalnız hüquq-mühafizə orqanlarının deyil, həm də hər bir vətəndaşın diqqət və məsuliyyət tələb edən məsələdir.