VII sinif şagirdi məktəbin pəncərəsindən yıxılıb - Rəsmi açıqlama
Sağlamlıq imkanları məhdud uşaqlar üçün 5 nömrəli Respublika xüsusi internat məktəbinin VII sinif şagirdi oktyabrın 20-də II mərtəbənin pəncərəsindən yıxılıb.
Bununla bağlı “Azərbaycan müəllimi”nin sorğusuna cavab olaraq Bakı Şəhəri üzrə Təhsil İdarəsindən bildirilib ki, məktəb rəhbərliyi dərhal təcili-tibbi yardım çağırıb.
Şagirdə ilkin tibbi yardım göstərildikdən sonra müayinə üçün səhiyyə müəssisəsinə aparılıb. Məlumata görə, şagirdin vəziyyəti qənaətbəxşdir.
Hadisə ilə bağlı şagirdin valideynlərinə və aidiyyəti qurumlara məlumat verilib. Məktəbin Pedaqoji Şurası da toplanaraq müəllimlərlə söhbət aparılıb və şagirdlərin təhlükəsizliyinin təmin olunması istiqamətində əlavə tədbirlərin görülməsi barədə müvafiq tapşırıqlar verilib.
