Azərbaycan Finlandiyada ilk dəfə təmsil olunduğu “Junction 2024” hakatonunda qalib olub

Azərbaycan ilk dəfə Avropanın ən böyük hakatonu olan "Junction 2024"də iştirak edərək tarix yazıb.

"Azərbaycan müəllimi" xəbər verir ki, Elm və Təhsil Nazirliyinin nəzdində olan Təhsilin İnkişafı Fondunun və Azərbaycan Respublikası Gənclər Fondunun dəstəyi ilə EESTEC Baku tərəfindən təşkil olunan "JunctionX Baku"24 tədbirinin qalibi olan "Evergreen" komandası 8-10 noyabr tarixlərində Helsinkidə keçirilən qlobal tədbirdə iştirak edərək Fingrid tərəfindən təşkil olunan "Empowering Development Transparency" (İnkişafın Şəffaflığını Gücləndirmək) adlı çağırışda qalib gəlib və 1,500 avro mükafat qazanıb.

"Fingrid" Finlandiyanın enerji sistemini idarə edən və elektrik bazarına aid məlumat mübadiləsini təmin edən Datahub-un fəaliyyətinə rəhbərlik edir. "Evergreen" komandasının təqdim etdiyi "Aligned" layihəsi, B2B müştərilərinin proqram təminatındakı yeniliklərdən xəbərdar olmasını, funksional tələbləri izləməsini və inkişaf mərhələlərini real vaxtda izləməsini təmin edən mərkəzləşdirilmiş platformadır. Süni intellekt dəstəyi ilə "Aligned" fərdiləşdirilmiş bildirişlər və müştəri-tərəfdaş əməkdaşlığını asanlaşdıran rahat istifadəçi təcrübəsi təklif edir.

"Junction 2024" 80-dən çox milləti təmsil edən, dünyanın müxtəlif yerlərindən gələn 1000-dən çox seçilmiş iştirakçını bir araya gətirib və tədbir ərzində 48 saatda 250-dən çox layihə yaradılıb. Bu il hakatona 3000-dən çox müraciət daxil olub, bütün bunlar "Junction"un Avropada innovasiya sahəsində mötəbər bir tədbir olduğunun göstəricilərindəndir.  

Bu uğur Azərbaycanın "Junction"da ilk iştirakını və elə ilk təmsilçilikdə qalibiyyət qazanmasını tarixi bir hadisəyə çevirir. "Evergreen" komandasının uğuru ölkəmizin istedadlı gənclərinin və innovativ potensialının qlobal səviyyədə nümayişidir.