BDU-da “Gənc Liderlər” Forumu keçirilib

Bakı Dövlət Universitetinin (BDU) ev sahibliyi və tərəfdaşlığı, Gənclər Fondunun, Azərbaycan Respublikası Gənclər Təşkilatları Milli Şurasının (NAYORA) dəstəyi, "Sosial Məsələlərin Həllinə Kömək” və “Sosial İnkişafa Yardım” İctimai birliklərinin təşkilatçılığı ilə “Gənc Liderlər" Forumu keçirilib.
 

Universitetdən “Azərbaycan müəllimi”nə bildirilib ki, forumun tərəfdaşları arasında “Gənclər İnkişaf Naminə" İctimai Birliyi, Azərbaycanlı Tələbə və Məzunlar Platforması (ASAP), BDU-nun Tələbə Gənclər Təşkilatı (TGT) da yer alıb.

Əvvəlcə Dövlət himni səsləndirilib, torpaqlarımızın bütövlüyü uğrunda həlak olan şəhidlərimizin əziz xatirəsi bir dəqiqəlik sükutla yad edilib.

BDU-nun Humanitar məsələlər və gənclər siyasəti şöbəsinin müdiri Ramin Səmədov Forumun gənclərin liderlik bacarıqlarının üzə çıxarılmasında əhəmiyyətli rol oynadığını deyib, Gənclər Fondu ilə həyata keçirilən müştərək layihələrdən bəhs edib. Gənclər Fondunun şöbə müdiri Orduxan Qəhrəmanzadə, NAYORA-nın baş katibi Nərminə Hüseynova və “Sosial Məsələlərin Həllinə Kömək” İctimai Birliyinin sədri Nərmin Daşdəmirbəyli çıxışlarında tədbirin əsas məqsədinin gənclərin sosial-iqtisadi, ictimai-siyasi, təhsil, məşğulluq, sağlamlıq və digər sahələrdə üzləşdikləri problemlərin mütəxəssislərlə müzakirə olunması və onların həllində gənclərin iştirakçılığının təmin edilməsi olduğunu deyiblər.

Daha sonra gənc liderlər – moda dizayneri Aynur Xəlilova, fəlsəfə doktoru Sakit Səmədov, psixoloq Vəfa Əsədova, təlimçi Orxan Şahbaz liderlik bacarıqlarının formalaşdırılması yolları ilə bağlı təcrübələrini bölüşüblər.

Forum gənclərin suallarının cavablandırılması ilə davam edib.

1/6