Azərbaycanda məktəblilərin bullinqlə bağlı vəziyyəti araşdırılıb

Ailə, Qadın və Uşaq Problemləri üzrə Dövlət Komitəsinin təşkilatçılığı ilə "Yetkinlik yaşına çatmayanlar arasında aqressiv davranış: Bullinq" mövzusunda keçirilən konfransda "Yetkinlik yaşına çatmayanlar arasında aqressiv davranış: Bullinqin aşkarlanması üzrə analitik hesabat" təqdim olunub.

“Azərbaycan müəllimi” xəbər verir ki, hesabat çərçivəsində Bakı Şəhər Təhsil İdarəsinin nəzdindəki 12 rayonda yerləşən məktəbdə sorğu aparılıb.

Sorğuda 13-17 yaş aralığında olan 2351 uşaq iştirak edib. Bu iştirakçılar Bakıda təhsil alan 210 min 104 məktəblinin arasından təsadüfi seçim yolu ilə müəyyənləşdirilib.

Sorğunun nəticələrinə görə, bullinqə məruz qalma halları siniflər arasında statistik olaraq əhəmiyyətli fərq göstərməsə də, bəzi siniflərdə fərqlər müşahidə edilib. Məsələn, 7-ci və 8-ci siniflərdə bullinq hallarının 9-cu siniflərə nisbətən daha çox olduğu müəyyən olunub. Eyni zamanda 11-ci siniflərdə bullinq hallarının 10-cu siniflərdən daha çox olduğu diqqət çəkib. Bu siniflərdə əsasən verbal və kiber bullinq halları üstünlük təşkil edib.

Tədqiqat göstərib ki, uşaqların müşahidələrinə əsasən bullinqin ən çox baş verdiyi məkan küçələrdir. Sorğuda iştirak edən uşaqların 28%-i bullinqin küçədə, 16,5%-i isə məktəbdə baş verdiyini bildirib. Bununla yanaşı, 6,2% uşaq bullinqin daha çox evdə yaşandığını, 17,9%-i isə bullinq hallarının virtual mühitdə, internetdə baş verdiyini qeyd edib.

Tədqiqatda həmçinin uşaqların ailə vəziyyətləri, davamiyyətləri, akademik göstəriciləri, idman və incəsənət fəaliyyətlərinə qoşulmaları ilə bullinqə məruz qalma və bullinq törətmə arasındakı əlaqələr də təhlil edilib.