Məktəbdə yanğın olub, müəllim və şagirdlər təxliyə edilib – AÇIQLAMA

Abşeron rayonunun Pirəkəşkül qəsəbəsində birmərtəbəli məktəb binasında elektrik lövhəsi və qoruyucu açar yanıb.

“Azərbaycan müəllimi” xəbər verir ki, bununla bağlı FHN məlumat yayıb.

Bildirilib ki, yanğınsöndürənlər tərəfindən 4 nəfər təhlükəsiz əraziyə təxliyə olunub.

Məktəb binası yanğından mühafizə olunub.

Yanğın yanğından mühafizə bölmələri tərəfindən söndürülüb.

Abşeron-Xızı Regional Təhsil İdarəsindən də məsələyə münasibət bildirib. Qeyd olunub ki, rayonunun Pirəkəşkül qəsəbəsində yerləşən məktəb binasında baş verən yanğın hadisəsi elektrik naqillərinin paylanma qutusunda qısaqapanma nəticəsində baş verib.

Məktəbdə əvvəlcədən yanğın təhlükəsizliyi ilə bağlı görülmüş tədbirlər sayəsində hadisənin yayılmasının qarşısı alınıb, şagirdlər və müəllimlər təxliyyə planına uyğun olaraq təhlükəsiz yerə təxliyyə ediliblər, onların sağlamlığına heç bir təhlükə yaranmayıb.

Yanğın zamanı yalnız elektrik naqillərinin paylama qutusu zərər görüb, tədris binası mühafizə edilib.

Hazırda aidiyyəti qurum tərəfindən hadisənin başvermə səbəbləri araşdırılır. Tədris prosesinin fasiləsizliyini təmin etmək üçün zəruri tədbirlər görülür, məktəbin elektrik sisteminin ən qısa zamanda bərpası çərçivəsində işlər aparılır.