Elnur Əliyev: Uşaq hüquqları sahəsində problemlərin həlli üçün konsepsiya hazırlanır

Elm və Təhsil Nazirliyi uşaq hüquqları sahəsində problemlərin həlli üçün konsepsiya hazırlayır.

"Azərbaycan müəllimi" xəbər verir ki, bu barədə Elm və Təhsil Nazirliyinin Uşaq və gənclərin inkişafı siyasəti şöbəsinin müdiri Elnur Əliyev "Yetkinlik yaşına çatmayanlar arasında aqressiv davranış: Bullinq" mövzusunda keçirilən konfransda deyib.

Elnur Əliyev qeyd edib ki, bullinq mövzusu nazirliyin xüsusi diqqət mərkəzindədir:

"Nazirlik çalışır ki, bu mövzu ilə bağlı hər hansı siqnallar olmasın. Bu ildən nazirlikdə Uşaq və gənclərin inkişafı siyasəti şöbəsi yaradılıb. Uşaq hüquqları ilə bağlı mövcud problemlərin həlli üçün konsepsiya hazırlayırıq. Həmin konsepsiyada uşaq hüquqlarının qorunması, sağlam mühitin yaradılması məqsədilə valideynlər üçün təlimlərin təşkili nəzərdə tutulur. Məktəblərdə psixoloji problemlərin və zorakılıq hallarının qarşısının alınması üçün tədbirlər görülməsi, monitorinqlərin gücləndirilməsi planlaşdırılır. Konsepsiya hazırlanıb təsdiqləndikdən sonra məktəblərə göndəriləcək".