Təkmilləşdirilmiş kurikulumlarda iqlim dəyişikliyinə nə qədər diqqət ayrılıb? – AÇIQLAMA

Təkmilləşdirilmiş fənn kurikulumlarında iqlim dəyişiklikləri və ekoloji məsələlərə xüsusi diqqət yetirilib. Məqsəd hər bir fərdin ekologiya ilə bağlı həssaslıq qazanmasını təmin etməkdir”. 

Bunu “Azərbaycan müəllimi"nə açıqlamasında Təhsil İnstitutunun Təbiət və texniki fənlərin proqramları şöbəsinin müdiri Mənsur Məhərrəmov deyib.

O bildirib ki, bu məqsədlə aşağı siniflərdən başlayaraq tədris olunan fənlərin məzmununa bu mövzular geniş şəkildə daxil edilib:

“Həyat bilgisi fənnində 172 alt standartdan 9-u (5%), Təbiət fənnində 107 alt standartdan 9-u (8%), "Biologiya"da 325 alt standartdan 13-ü (4%), "Coğrafiya"da isə 153 alt standartdan 44-ü (29%) iqlim dəyişiklikləri və ekoloji məsələlərlə bağlıdır”.

Şöbə müdiri əlavə edib ki, tədris olunan əsas mövzular "Biologiya"da “Canlı orqanizmlər və ətraf mühit”, təbiət fənnində “Enerji, qüvvə və hərəkət” və “Ətraf mühit və biz”, "Həyat bilgisi"ndə “Canlılarda struktur və proseslər”, coğrafiyada isə “Mövqe və məkan” kimi məzmunları əhatə edir:

“Tədris zamanı insan fəaliyyətinin ətraf mühitə təsirləri, təbii ehtiyatların istifadəsi və fəlakətlərin nəticələri, enerji qənaəti və bərpa olunan enerji mənbələri, təkrar emal və israfın qarşısının alınması, qlobal istiləşmə və ekosistemlərdə qarşılıqlı təsirlər, meşələrin qırılması, növlərin nəslinin kəsilməsi, plastik tullantıların və gübrələrin ekosistemə təsiri, ekoloji maarifləndirmə və bioloji müxtəlifliyin qorunması, Azərbaycanın ekosistemləri və iqlim problemləri xüsusi vurğulanır”.

Onun sözlərinə görə, yeni tədris proqramında təbii resursların səmərəli istifadəsi və ekologiya sahəsində beynəlxalq təşəbbüslərin öyrənilməsi dəstəklənir:

“Bu mövzuların tədrisi şagirdlərdə həm lokal, həm də qlobal problemləri dəyərləndirmə bacarığı formalaşdırır. Ekoloji tarazlığın qorunması, dayanıqlı inkişaf strategiyaları və risklərin təhlili kimi məsələlər də kurikulumun əsas hissələrini təşkil edir”.