Yüksək nəticə toplayan region olimpiadaçıları - Uğur hekayələri

Respublika fənn olimpiadalarının rayon (şəhər) mərhələsinin nəticələrinə əsasən, Şirvan-Salyan Regional Təhsil İdarəsinin əhatə etdiyi rayonlar üzrə təhsil müəssisələrindən 977 şagird yarımfinal mərhələsində iştirak etmək hüququ qazanıb. Bu şagirdlərdən 6 nəfər maksimum nəticə əldə edib. 

"Azərbaycan müəllimi" həmin şagirdlərin daha bir neçəsi ilə həmsöhbət olub.

“Ümidim çoxdur və növbəti mərhələyə keçəcəyimə inanıram”

İlk müsahibimiz Nicat Misirlidir. O, Biləsuvar şəhər  K.Ağayev adına texniki fənlər təmayüllü internat tipli məktəb-liseyin 8-ci sinif şagirdidir. 

- “Texniki fənlərə marağım olduğu üçün VII sinifdən fizika ilə tanış oldum. Müəllimlərimin düzgün istiqamətləndirməsi nəticəsində fizika fənni üzrə bu müsabiqəyə qoşuldum. Müsabiqəyə müxtəlif ədəbiyyatlar üzrə hazırlaşmışam və mənə bu yolda Xəzər müəllim dəstək olub, yay tətili müddətində də hazırlaşıb, əlavə məlumat toplamışam. Ümidim çoxdur və növbəti mərhələyə keçəcəyimə inanıram. Yarımfinaldakı sualların hər biri üçün hazırlaşıram. Fizika fənni üzrə olimpiadanın 1-ci turunda 100 bal nəticə göstərmişəm və keçən il 7-ci sinifdə Respublika fənn müsabiqəsində fizika fənni üzrə final mərhələsində 64,5 bal nəticə göstərmişəm”.

“İnternetdən resurslar tapıb onlarla özümü inkişaf etdirirdim”

Mövlan Əmənov Şirvan şəhər 18 nömrəli məktəb-liseyin XI sinfində təhsil alır. Mövlanın sözlərinə görə, IT sahəsinə böyük marağı var və bu sahədə özünü inkişaf etdirməyə çalışır:

- “Mən artıq keçən ildən etibarən informatika olimpiadalarında iştirak edirəm və bu sahə mənim marağımı çox cəlb edir. 2023-cü ilin əvvəllərində proqramlaşdırmaya başlayanda olimpiadalar barədə çox məlumatım yox idi. Lakin 2023-2024-cü dərs ili üçün RFO-ya qeydiyyat başlayanda müəllimlərimin tövsiyəsi ilə mən də qeydiyyatdan keçdim. Həmin vaxt düşünmürdüm ki, olimpiada sahəsində uğurlu ola bilərəm, amma özümü sınamağa qərar verdim. Fərdi şəkildə evdə olimpiada hazırlıqlarına başladım. İnternetdən resurslar tapıb özümü inkişaf etdirirdim. Artıq bu sahədə həqiqətən uğurlu ola biləcəyimi görüb ciddi şəkildə hazırlaşmağa başladım. 2023-2024-cü dərs ilində informatika fənni üzrə bürünc medala layiq görüldüm. 

Bu il də daha çox uğur qazanmaq məqsədilə müsabiqəyə qeydiyyatdan keçdim. Keçən il yeni başlayanda informatika müəllimim, Azərbaycan Texniki Universitetinin müəllimi Anar Rəşidovdan kömək alırdım. Onun mənə çox böyük dəstəyi oldu. Ümumiyyətlə, proqramlaşdırma müsabiqələri üçün internetdə saysız-hesabsız resurs var. Mən də bu resurslardan istifadə edərək hazırlaşırdım. Bu resursların çoxu ingilis dilində olurdu və öz dilimizdə tapmaq çətin olurdu. Amma öz dilimizdə də resurslar var.  Məsələn, köhnə beynəlxalq olimpiadaçı Barış Namazovun artıq bir neçə ildir keçirdiyi "Qış kampı" adlı hazırlıq düşərgəsi var və bu düşərgə mənə çox böyük kömək olmuşdu. Biz olimpiadaçılar bir-birimizlə sıx əlaqədə olduğumuz üçün və bir yerdə dərs oxuyub, bir-birimizə kömək göstərdiyimiz üçün mənim işim daha da asanlaşırdı. Yarımfinal mərhələsindən də uğurla keçdikdən sonra, bir olimpiada müəllimi ilə hazırlaşmağı qərara aldım və final mərhələsinə qədər Azərbaycan Texniki Universitetinin müəllimi Kənan Əsgərli ilə hazırlaşdım. 
 
Bu ildə artıq özüm öz gücümə hazırlaşa biləcəyimə, müsabiqədə uğurla iştirak edə biləcəyimə inandığım üçün hansısa müəllimlə hazırlaşmağı düşünmürdüm. Mənə görə bir olimpiadaçının əlində yetərli qədər resursu və kifayət qədər vaxtı varsa, eyni zamanda bunlardan necə istifadə edə biləcəyini bilirsə həmin olimpiadaçının uğursuz olma ehtimalı çox azdır.
 
Keçən ildən bu sahə ilə məşğul olmağa başladığımdan bəri bir çox uğurlarım olub. Bundan əlavə bu il, eyni zamanda RFO-da riyaziyyat fənni üzrə birinci mərhələdə 73 bal toplayaraq növbəti mərhələyə keçə bilmişəm. Daha sonra “PAŞA Bank”ın keçirdiyi "Pasha Cup VI" proqramlaşdırma müsabiqəsi və İRİA-nın keçirdiyi "IDDA CUP 2024" proqramlaşdırma yarışı üzrə finalçı olmuşam. 

Əlavə olaraq, Almaniyanın "Constructor" Universitetinin və İnnovasiya və  Rəqəmsal İnkişaf Agentliyinin təşkil etdiyi "DATS" proqramlaşdırma düşərgəsində iştirak üçün vəsiqə qazanmış və həmin düşərgəni mükəmməlik sertifikatı ilə bitirmişəm. Düşünürəm ki, yarımfinal mərhələsində də uğurla iştirak edəcəyəm”.

“VI sinifdən qarşıma olimpiada qalibi olmağı məqsəd qoymuşdum”

Daha bir maksimum nəticə əldə edən şagird Neftçala rayonu Xıllı qəsəbə F.Quliyev adına 2 nömrəli tam orta ümumtəhsil məktəbinin XI sinfində oxuyan Ramilə İmanlıdır:

“Artıq 4-cü ildir ki, Respublika fənn olimpiadalarında tarix fənni üzrə iştirak edirəm. Ardıcıl olaraq, 2022-2023 və 2023-2024-cü tədris illərində bürünc medal qazanmışam. Uşaqlıqdan tarix fənninə xüsusi sevgim var. Düşünürəm ki, məhz fənnə qarşı olan bu sevgi uğur qazanmağımda başlıca amillərdən biridir. Bildiyimiz kimi, Respublika fənn olimpiadalarında 8-ci sinifdən etibarən iştirak etmək mümkündür. Mən artıq 6-cı sinifdə oxuyarkən qarşıma olimpiada qalibi olmağı məqsəd qoymuşdum. Buna görə də dərsləri xüsusi diqqətlə öyrənir, eyni zamanda müəllimlərimdən dəstək alırdım. Həmçinin keçmiş olimpiada qalibləri ilə əlaqə yaradıb onların tövsiyələrindən yararlanmağa çalışırdım. Dərslərdən əlavə müxtəlif sahələrdə özümü sınamağı sevirəm. İctimai TV-də yayımlanan "Əlaçı" verilişində iştirak edib qalib olmuşam. Gələcəkdə daha böyük uğurlar qazanmaq niyyətindəyəm". 

Mənim fikrimcə, uğur qazanmağın yolu vaxtı düzgün idarə etməkdən keçir. Yarımfinal turuna hazırlıqlar sistemli şəkildə davam edir, hər şeyi vaxtında etməyə, oxuduqlarımı dərindən araşdırıb təhlil etməyə çalışıram.