Məktəblilərimiz IX “Info1Cup” proqramlaşdırma müsabiqəsində uğur qazanıblar

Məktəblilərimiz IX “Info1Cup” proqramlaşdırma müsabiqəsində uğur qazanıblar

8-9 fevral tarixlərində Rumıniyada IX “Info1Cup” proqramlaşdırma müsabiqəsi keçirilib. 

“Azərbaycan müəllimi” xəbər verir ki, 18 ölkədən 166 şagirdin proqramlaşdırma üzrə biliklərini sınadığı müsabiqəyə məktəblilərimiz Azərbaycan Texniki Universitetinin və Gəncə Dövlət Universitetinin laboratoriyalarından onlayn qaydada qoşulublar.

Bakı şəhəri 157 nömrəli tam orta məktəbin 10-cu sinif şagirdi Həsən Vəliyev qızıl medala, Bakı Türk Anadolu liseyinin 10-cu sinif şagirdi Əhməd Qəmbərli gümüş medala, Bakı şəhəri Fizika, riyaziyyat və informatika təmayüllü liseyin 10-cu sinif şagirdi Rahidil Bayramlı isə bürünc medala layiq görülüb.

Xatırladaq ki, 2017-ci ildən etibarən məktəblilərimizin beynəlxalq fənn olimpiadalarına hazırlıq prosesi “Azercell Telekom” MMC-nin dəstəyi ilə həyata keçirilir. Bu müddət ərzində Azərbaycanın bölgə və paytaxt məktəblərində təhsil alan şagirdlərimiz fərqli yaş qrupları üzrə müxtəlif miqyaslı proqramlaşdırma müsabiqələrində ümumilikdə 94 medal qazanıblar.