AzMİU Malayziyanın nüfuzlu universiteti ilə əməkdaşlığa başlayır

AzMİU Malayziyanın nüfuzlu universiteti ilə əməkdaşlığa başlayır

Azərbaycan Memarlıq və İnşaat Universitetinin (AzMİU) nümayəndə heyəti Malayziyanın nüfuzlu universitetlərindən olan Asiya-Sakit Okean Texnologiya və İnnovasiya Universitetinin Keyfiyyət İdarəetmə direktoru Nur Zahdı Aldın ilə görüş keçirib. 

Universitetdən “Azərbaycan müəllimi”nə bildirilib ki, görüşdə beynəlxalq əlaqələr üzrə prorektor professor Nərgiz Abdullayeva, elm və innovasiya məsələləri üzrə prorektor professor Nigar Aslanova, Strateji planlaşdırma şöbəsinin müdiri Qənirə Məmmədzadə və Xarici əlaqələr şöbəsinin müdiri Fərhad Əliyev iştirak ediblər.

Görüş çərçivəsində elmi-tədqiqat, beynəlmiləlləşdirmə və universitetin strateji inkişaf hədəfləri müzakirə olunub. Tərəflər gələcək əməkdaşlıq imkanlarını dəyərləndirib və birgə fəaliyyət istiqamətləri üzrə fikir mübadiləsi aparıblar.

Nəticə olaraq, yaxın vaxtlarda AzMİU və Asiya-Sakit Okean Texnologiya və İnnovasiya Universiteti arasında əməkdaşlıq memorandumunun imzalanması planlaşdırılır. Bildirək ki, bu addım Asiya universitetləri ilə beynəlxalq əlaqələrinin genişlənməsinə və elmi-tədqiqat sahəsində yeni imkanların yaradılmasına töhfə verəcək.