Bu kollecdə cəmi 11 oğlan oxuyur – REPORTAJ

Bu kollecdə cəmi 11 oğlan oxuyur – REPORTAJ 

Regionlarımızda səhiyyə sisteminin inkişafı, bu sahənin maddi-texniki bazasının, kadr potensialının gücləndirilməsi və infrastrukturun yeniləndirilməsi daim diqqət mərkəzindədir. Ölkədə ən müasir tələblərə cavab verən yeni xəstəxanaların tikilməsi, mövcud tibb ocaqlarının yenidən qurulması geniş vüsət alıb. Bu baxımdan Quba Tibb Kolleci şimal bölgəsində səhiyyə sahəsində kadr potensialının gücləndirilməsinə mühüm töhfə verən orta ixtisas təhsili müəssisəsidir.
  
“Azərbaycan müəllimi” kollecin fəaliyyəti ilə yaxından tanış olaraq təhsil ocağının 10 illik inkişaf yoluna nəzər salıb.  
      
“Məzunlarımızın əksəriyyəti  bölgənin xəstəxanalarında  fəaliyyət göstərir”

Quba Tibb Kollecinin direktoru, həkim-terapevt Mikayıl Mirzəliyev qeyd edib ki, rəhbərlik etdiyi təhsil ocağı 19 sentyabr 2013-cü ildə Nazirlər Kabinetinin 261 nömrəli qərarı əsasında yaradılıb: “Kollec 2014-2015-ci tədris ilindən fəaliyyətə başlayıb. Kollecə qəbul mərkəzləşdirilmiş qəbul imtahanlarının nəticələrinə əsasən aparılır. Qəbul planında “Tibb bacısı (qardaşı) işi” ixtisası üzrə 40 (20 ödənişli, 20 dövlət hesablı),”Mamalıq işi” ixtisası üzrə 25 (15 ödənişli, 10 dövlət hesablı) yer ayrılır. Quba Tibb Kollecinə Quba, Qusar, Xaçmaz, Şabran, Siyəzən rayonlarında yaşayan abituriyentlər qəbul olurlar. Hazırda müəssisədə 220 tələbə təhsil alır. Quba Tibb Kollecində tədris Azərbaycan dilində, təhsil forması əyanidir. Kollecdə 24 müəllim, 24 texniki işçi çalışır. Müəssisəmiz şimal zonasında orta ixtisaslı tibb kadrları hazırlayan yeganə tibb kollecidir. İndiyə kimi məktəbin 386 məzunu diplom alıb. Məzunlarımızın əksəriyyəti  bölgədəki dövlət və özəl xəstəxanalarında  fəaliyyət göstərir”.

Kollecin tədris işləri üzrə direktor müavini, həkim-radioloq Nəzirə Əliyeva bizi kolleclə yaxından tanış edir: “Kollecimiz bir korpusdan ibarətdir. Üçmərtəbəli kollec binası təhlükəsizlik standartlarına tam uyğunlaşdırılıb. Binada istilik və su təchizatı sistemi müasir texnologiyalar əsasında qurulub, fasiləsiz və səmərəli fəaliyyət göstərir. Otaqların genişliyi və işıqlılığı tədris prosesinin keyfiyyətli həyata keçirilməsinə şərait yaradır. Ümumilikdə kollec binası tələbələrin və həkim heyətinin rahatlığı üçün optimal şəraitə malikdir və təhsil prosesinin effektiv təşkilinə tam cavab verir. Kollecdə 12 dərs otağı, geniş kitabxana, laboratoriya otaqları, anatomiya, farmakologiya kabinetləri mövcuddur. Dərs otaqları bütün lazımi müasir avadanlıqlarla təmin olunub. Proyektor lövhə, tibbi avadanlıq, mulyaj, anatomik modellərdən istifadə edilir. Kollecdə 209 qız, 11 oğlan tələbə təhsil alır. Oğlan tələbələrimiz arasında hazırda hərbi xidmətdə olanlar var. Tədris ikinövbəli aparılır”. 

“İxtisaslarından əlavə biz tələbələrimizi vətənpərvərlik ruhunda tərbiyə edirik”  

Quba Tibb Kollecinin müəllimlərilə söhbət edərkən öyrənirik ki, onların əksəriyyəti ixtisasca həkimdir. Pərviz Seyidgülov həkim-kardioloqdur, 23 illik fəaliyyətinin 6 ilində döyüş bölgəsində yerləşən hərbi hissənin tibb xidmətinin rəisi vəzifəsində çalışıb. Ehtiyatda olan tibb xidməti mayorudur: “2016-cı ildən Quba Tibb Kollecində işləyirəm. İnsan anatomiyası və fiziologiyası fənnini tədris edirəm. Tədris üçün lazım olan ədəbiyyat, əyani vasitələr, mulyajlar bizim fənnimizi ən son metodlarla tədris etməyə imkan verir. Tələbələrimiz seçdikləri peşəni sevir, verilən tapşırıqları yerinə yetirir, daha yüksək nailiyyətlər üçün çalışırlar. İxtisaslarından əlavə, biz tələbələrimizi vətənpərvərlik ruhunda tərbiyə edirik. Bunun nəticəsidir ki, bir neçə tələbəmiz könüllü olaraq hərbi hospitalda xidmət edir. Vətən müharibəsində tələbəmiz Ceyhun İsayev torpaqlarımızın azadlığı uğrunda gedən döyüşlərdə qəhrəmancasına şəhid olub. Ölümündən sonra "Vətən uğrunda", "Suqovuşanın azadlığı uğrunda" medalları ilə təltif olunmuş şəhidimiz bütün tələbələrimiz üçün örnəkdir”.

“Tibb koleclərinə qəbul imtahanına kimya, biologiya fənlərindən suallar salınsın”

Elşən Heydərli 8 ildir ki, Quba Tibb Kollecində müəllim işləyir. İxtisasca həkim-reanimatoloqdur: “Kollecdə daxili, yoluxucu xəstəliklər, reanimotologiya, ailə təbabəti dərslərini keçirəm. İş şəraitimiz yaxşıdır. Tələbələrin dərsə davamiyyəti yüksək səviyyədədir. Lazımi dərs vəsaitləri ilə təmin olunmuşuq. Yeganə çətinliyimiz müəllim çatışmazlığı ilə bağlıdır”. 

E.Heydərli kollecə qəbul imtahanı ilə bağlı da fikirlərini bildirib: “Qəbul imtahanına tibb sahəsinə uyğun olmayan fənlərdən suallar salınır. Ona görə tələbələr buraya lazımi  biliklərlə gəlmirlər. Bu da onlara tibbi biliklərin aşılanmasında çətinlik yaradır. Təklif edərdim ki, tibb kolleclərinə qəbul imtahanına kimya, biologiya fənlərindən suallar salınsın”.

“Rayonlarda ixtisaslı əczaçılara böyük ehtiyac duyulur”

İxtisasca əczaçı olan Gültəkin Məmmədrzayeva kollec fəaliyyətə başladığı ilk gündən burada farmakologiya fənnini tədris edir. Gültəkin müəllim kollecdə əczaçılıq ixtisasının açılmasını arzu edir: “Rayonlarda, kəndlərimizdə apteklərdə ixtisaslı əczaçılara böyük ehtiyac duyulur. Bu baxımdan kollecimiz şimal bölgəsi üzrə əczaçı hazırlasaydı, çox yaxşı olardı. Tələbələrimizin dərsə münasibəti, davamiyyət yüksək səviyyədədir. Öz üzərlərində çalışır, ciddi səy göstərirlər, öyrənməyə həvəslidirlər. Dərslərin maraqlı keçməsi üçün slaydlardan, əyani vəsaitlərdən istifadə edirik. Arzu edərdim ki, kollecimiz kompüterlərlə təchiz edilsin, proyektorlar bütün sinif otaqlarında olsun”.

Ağ xalatlı tələbələr  

Müəllimlərlə tanışlıqdan sonra söhbətimizi tələbələrlə davam etdiririk. Lətifə Hüseynova "Tibb bacısı (qardaşı) işi" ixtisasının 1-ci  kurs tələbəsidir. Kollecdə hər cür şəraitlə təmin olunduqlarını qeyd edən gənc deyir: “Qrupumuz 25 nəfərdən ibarətdir, aramızda oğlan da var. Tələbə olaraq kollecimizdən və keçilən  dərslərdən çox razıyam. Biz təcrübə üçün xəstəxanaya gedib təcrübə toplayırıq. Mən buraya Xaçmaz rayonundan gəlirəm. Kollecdə oxuduğa başlayandan fənləri yaxşı mənimsəməyə çalışıram və bundan sonra daha yaxşı oxuyacağıma inanıram”. 

Arzu Abbasova “Tibb bacısı (qardaşı) işi” ixtisasının 2-ci kursunda oxuyur: “Kollecimizdə dərs keçən həkim-müəllimlər yüksək peşəkarlıq və geniş təcrübəyə malikdirlər. Onlar tələbələrə nəzəri biliklərləri, praktik vərdişləri effektiv şəkildə öyrədirlər. Hər bir həkim öz sahəsində dərin biliklərə sahib olmaqla yanaşı, pedaqoji bacarıqları ilə də seçilir. Dərslər interaktiv metodlarla, müasir tədris yanaşmaları əsasında aparılır, bu da biz tələbələrin materialı daha yaxşı mənimsəməsinə imkan yaradır. Qrupumuzda 21 qızla yanaşı, 3 oğlan da var. Dərslərimizin əksər hissəsini kollecdə, müəyyən hissəsini xəstəxanada keçirik”. 

Tələbə Rafiq Məmmədov Vətən müharibəsi iştirakçısı olub. Füzuli, Cəbrayıl, Şuşa, Kəlbəcər uğrunda gedən döyüşlərdə şücaət göstərib. Hazırda kollecin "Tibb bacısı (qardaşı) işi" ixtisasının 2-cu kursunda təhsil alır: “Mən bu ixtisası xalqımızın sağlamlığının qorunması üçün seçdim. Mühazirə və təcrübələrdə müxtəlif xəstəliklər haqqında, tibb işcisinin xəstə ilə necə davranması  qaydalarını öyrənirik. Arzum kolleci bitirdikdən sonra peşəmə sadiq qalaraq millətimə əlimdən gələn qədər layiqincə xidmət göstərməkdir”.

Məlumdur ki, səhiyyə sisteminin effektiv işləməsi bir çox məqamlarda bilavasitə yüksəkixtisaslı əməkdaşlardan asılıdır. Bu baxımdan tibb təhsili verən ali və orta ixtisas təhsili müəssisələrinin əsas hədəfi bu sahə üzrə peşəkar, savadlı kadrların hazırlanması olmalıdır. Göründüyü kimi, Quba Tibb Kollecinin də məqsədi öz sahəsi üzrə kifayət qədər biliyə və praktik baxımdan yetərli bacarıqlara sahib ixtisaslaşmış tibb bacılarının və qardaşlarının yetişdirilməsidir.