"Universitetlərin “rəqəmsal tələbə kartı” layihəsinə qoşulması faydalı olar" – Osman Gündüz

"Universitetlərin “rəqəmsal tələbə kartı” layihəsinə qoşulması faydalı olar" – Osman Gündüz

"Ötən il qısa müddətdə Azərbaycan Texniki Universitetinin 10 mindən çox tələbəsi myGov mobil tətbiqini telefonlarına yükləyib və SİMA imza ilə “rəqəmsal tələbə kartı”nda qeydiyyatdan keçib. Universitetin Mühafizə xidmətinə isə İnnovasiya və Rəqəmsal İnkişaf Agentliyinin əməkdaşları təlim keçib. Düşünürəm ki, belə bir layihənin digər universitetlər tərəfindən də reallaşdırılması çox faydalı olardı”.  

"Azərbaycan müəllimi" xəbər verir ki, bununla bağlı Azərbaycan İnternet Forumunun prezidenti Osman Gündüz öz sosial media hesabında paylaşım edib.  

O, universitetlərə çağırış edərək qeyd edib ki, “rəqəmsal tələbə kartı” layihəsinə qoşulmaq üçün universitetlərdə məsul şəxslərin ayrılması və İRİA ilə əlaqə saxlanılması yetərlidir:  

"Layihənin qısa zamanda reallaşması üçün İRİA və ETN tərəfindən bütün imkanlar yaradılıb, öyrədici materiallar hazırlanıb və zəruri dəstək göstərilir. Bütün xidmətlər pulsuzdur".

Osman Gündüz paylaşımında onu da vurğulayıb ki, universitetlər sadəcə myGov tətbiqinin tələbələr tərəfindən yüklənməsini təşviq etməli və tələbə məlumatlarını yoxlayacaq şəxslərə checker.e-gov.az portalında səlahiyyətlər verməlidir.  

"Düşünürəm ki, yüz minlərlə tələbənin rəqəmsal hökumət həllərinə – “rəqəmsal tələbə kartı”, “rəqəmsal şəxsiyyət vəsiqəsi” və digər rəqəmsal sənədlərə, SİMA imzaya sahib olması ölkədə rəqəmsal transformasiyanın inkişafına ciddi təkan verəcək" – deyə o əlavə edib.  

İnternet Forumunun prezidenti hesab edir ki, universitetlərin “rəqəmsal tələbə kartı” layihəsinə qoşulması və bunun təşviq edilməsi çox vacib və faydalı addım olar.  

Qeyd edək ki, ötən il İnnovasiya və Rəqəmsal İnkişaf Agentliyi, Elm və Təhsil Nazirliyi və Azərbaycan Texniki Universitetinin birgə təşəbbüsü ilə rəqəmsal tələbə kartlarından istifadə layihəsinə start verilib.  

İRİA və ETN mövcud datalardan istifadə etməklə yeni dəyər formalaşdıraraq tələbə biletlərini myGov tətbiqi üzərindən rəqəmsal formada təqdim etmək imkanı yaradıb.  

Beləliklə, tələbələr SİMA imza ilə myGov tətbiqinə daxil olaraq, burada tələbə məlumatlarının əks olunduğu “tələbə kartı”nı əldə edirlər. Bununla da tələbələr fiziki tələbə bileti olmadan da tələbə statuslarını təsdiqləyə bilirlər.  

İRİA, myGov-dakı tələbə məlumatlarının oxunması üçün “MyGov Checker” tətbiqini də yaradıb. Qurumlar öz səlahiyyətli şəxsləri vasitəsilə bu tətbiqdən istifadə edərək tələbə məlumatlarını yoxlaya bilirlər.