ARTİ məktəb psixoloqları üçün dərsdinləmə vərəqi nümunəsi təqdim edir

ARTİ məktəb psixoloqları üçün dərsdinləmə vərəqi nümunəsi təqdim edir

Ölkəmizdə uşaqların fiziki və psixoloji təhlükəsizliyinin qorunması məsələsi aktual məsələrdən biridir. Buna görə də bir sıra tədbirlər həyata keçirilir ki, hər birinin də məqsədi uşaqların rifahının təmin olunmasıdır. Ümumi təhsil müəssisələrində də şagird müdafiəsi və təhlükəsizliyini təmin edə bilmək üçün məktəb psixoloqlarının hadisələrə çevik yanaşması mütləqdir. Bunun üçün də Təhsil İnstitutu məktəb psixoloqları üçün effektiv müşahidə və analiz imkanları yaradan yeni bir dərsdinləmə vərəqi nümunəsini təqdim edir.

“Azərbaycan müəllimi” xəbər verir ki, bu nümunə məktəb psixoloqlarının işinin daha sistemli şəkildə təşkilinə, eləcə də müşahidənin və qeydiyyatın məqsədyönlü aparılmasına kömək edəcək. Dərsdinləmə vərəqi vasitəsilə psixoloqlar şagirdlərin təhsil mühitindəki iştirakını daha dəqiq qiymətləndirə, onların psixoloji və emosional ehtiyaclarını müəyyən edə bilərlər.

Təqdim olunan sənədin əvvəlində dərsdinləmə prosesinin məqsədləri, tətbiq qaydaları, meyarlar və istifadə üsulları barədə ətraflı məlumat verilir. Daha sonra iki dərsdinləmə vərəqi nümunəsi təqdim edilir:

• Dərsdinləmə nümunə vərəqi 1- fərdi şagird müşahidəsi
• Dərsdinləmə nümunə vərəqi 2- sinfin ümumi müşahidəsi.

Birinci nümunə fərdi şagirdin dərs prosesindəki fəaliyyətləri zamanı psixoloji vəziyyətini ilkin şəkildə müəyyən etməyə xidmət edir. Digər nümunə isə ümumilikdə bir sinfin şagirdlərinin psixoloji vəziyyətini müşahidə etməyə imkan verir. Psixoloq ehtiyac yarandıqda və məqsəddən asılı olaraq bu nümunələrdən istifadə edərək dərsdinləmədə iştirak edə bilər.

Qeyd edək ki, bu sənəd ümumi təhsil müəssisələrində çalışan məktəb psixoloqları üçün praktik və istifadəsi asan bir alət olmaqla yanaşı, məktəbdaxili psixoloji dəstəyin keyfiyyətini artırmağa xidmət etmək üçün nəzərdə tutulur.

PSİXOLOQ ÜÇÜN DƏRSDİNLƏMƏ VƏRƏQİ