Tələbələr arasında zərərli vərdişlərlə mübarizə mövzusunda maarifləndirmə aparılıb

Tələbələr arasında zərərli vərdişlərlə mübarizə mövzusunda maarifləndirmə aparılıb

Azərbaycan Memarlıq və İnşaat Universitetində (AzMİU) Tələbə Həmkarlar İttifaqı Komitəsinin (THİK) təşkilatçılığı ilə “Asılılıq nədir? Necə formalaşır? Zərərli vərdişlərlə mübarizə üsulları” mövzusunda maarifləndirici görüş keçirilib.

Universitetdən “Azərbaycan müəllimi”nə bildirilib ki, tədbiri giriş sözü ilə THİK sədri Şahmar Rəfili açaraq narkomaniyaya qarşı mübarizədə maarifləndirmə tədbirlərinin əhəmiyyətini vurğulayıb. Bildirib ki, bu cür tədbirlər gəncləri təhlükələr barədə məlumatlandırmaqla yanaşı, sağlam həyat tərzinə yönləndirmək baxımından da mühüm rol oynayır.

Görüşdə klinik psixoloq Heyran İbrahim və kimyəvi asılılıq üzrə mütəxəssis Tağı Abbaszadənin çıxışları dinlənilib. 

Mütəxəssislər asılılığın yaranma səbəbləri, psixoloji və fiziki təsirləri, eləcə də bu vərdişlərdən xilas olma yolları barədə ətraflı məlumat veriblər. 

Çıxışlarda narkomaniya ilə mübarizədə tətbiq olunan müasir metodlardan danışılıb. Ölkəmizdə müxtəlif bərpa mərkəzlərində bu metodların uğurla həyata keçirildiyi və effektiv nəticələr əldə olunduğu nəzərə çatdırılıb. 

Sonda mütəxəssislər tələbə gəncləri bu sahədə mövcud dəstək mexanizmlərindən xəbərdar olmağa və zərərli vərdişlərdən uzaq durmağa çağırıblar.