Uşaqlar oktyabradək qış, mayadək yay geyimləri ilə təmin olunmalıdır – TƏLƏBLƏR

Uşaqlar oktyabradək qış, mayadək yay geyimləri ilə təmin olunmalıdır – TƏLƏBLƏR

Uşaq müəssisələrində iqlim şəraiti nəzərə alınmaqla, qış geyimlərinin ən geci oktyabr, yay geyimlərinin isə ən geci may ayında uşaqlara aid dolablara yerləşdirilməlidir.

“Azəbaycan müəllimi” xəbər verir ki, bu, Nazirlər Kabinetinin təsdiqlədiyi “Dövlət və qeyri-dövlət uşaq müəssisələrində göstərilən xidmətlərin keyfiyyətinə dair tələblər”də öz əksini tapıb.

Sənəddə müəssisələrdə yaşayış şəraitinə dair tələblər müəyyən edilib.

Həmin tələblərə görə, uşaqlar mövsümi geyim əşyaları ilə, məktəb yaşında olan uşaqların məktəbli forması, dərslik və dərs ləvazimatları ilə təchiz edilməlidir. Bundan başqa, müəssisələrdə hər bir uşaq üçün ayrıca çarpayı, təmiz yataq dəsti, paltarların saxlanması üçün dolab, ayrıca paltardəyişmə otağı olmalı, yataq otaqları uşaqların yaşı, cinsi (5 yaşdan yuxarı uşaqlar üçün) və digər xüsusiyyətləri nəzərə alınmaqla təchiz edilməlidir. Müəssisədə camaşırxana otağı olmalıdır. 

Bütün otaqların gün ərzində 2 dəfə yuyucu vasitələrlə təmizlənməli, pilləkən və eyvanların məhəccəri olmalı, müəssisədə uşağın nəqliyyatın hərəkətinin gur olduğu küçəyə, magistral yola, su təsərrüfatı obyektlərinə və ya digər təhlükəli ərazilərə getməsinin qarşısını alan hasar, yaxud maneə olmalıdır. Müəssisədə uşaqların təhlükəsizliyinə xələl gətirə bilən təhlükə mənbəyi olmamalı, bütövlükdə müəssisələrin ətrafında olan həyət, zirzəmi, mansard (girişi açıq olan), çardaq, qaraj, üstü açıq quyu (hovuz) və ya anbar ərazisinin uşaqların təhlükəsizliyi baxımından yoxlanılmalıdır.