Azərbaycan dili üzrə sertifikasiya imtahanını kimlər və niyə verəcək?

Dövlət İmtahan Mərkəzi (DİM) Azərbaycan dili üzrə sertifikasiya imtahanının sınaq versiyası üçün onlayn platforma istifadəyə verib. 

Bəs bu imtahanlar namizədin hansı bilik və bacarıqlarını ölçəcək? Bunun vasitəsilə kimlər öz bilik səviyyəsini yoxlaya biləcək?

DİM-dən “Azərbaycan müəllimi”nə verilən məlumata görə, bu imtahan Azərbaycan dili üzrə bilik və bacarıqların A1-dən C2-yə qədər müxtəlif səviyyələr üzrə qiymətləndirilməsini nəzərdə tutur. Sınaq prosesinin məqsədi imtahanının effektivliyini yoxlamaq və onu daha da təkmilləşdirməkdir.

Azərbaycan dili üzrə sertifikasiya imtahanı dinləyib-anlama, oxuyub-anlama, yazı və danışma bacarıqlarını yoxlayır. Tapşırıqlar müxtəlif formatlarda təqdim olunur:  

- Qapalı tipli çoxseçimli testlər
- Açıq tipli uyğunluq tapşırıqları
- Yazılı cavab tələb edən suallar  

İmtahan ümumilikdə 3 saat davam edir və aşağıdakı bloklardan ibarətdir:  

1. Dinləyib-anlama (45 dəqiqə)  
- 6 mətn üzrə 30 sual təqdim edilir.  
- Hər mətn yalnız 1 dəfə dinlənilə bilər.
  
2. Oxuyub-anlama və leksik-qrammatik biliklər (60 dəqiqə)  
- 5 mətn üzrə 33 sual və leksik-qrammatik bilikləri yoxlayan 6 sual olmaqla ümumilikdə 39 sual təqdim edilir.  

3. Yazı (60 dəqiqə)  
- 1-ci hissə: 20 dəqiqə ərzində 120-140 sözdən ibarət e-mail, məktub, tərcümeyi-hal və s. yazılır. (Ümumi balın 30%-ni təşkil edir)  
- 2-ci hissə: 40 dəqiqə ərzində 200-250 sözdən ibarət esse yazmaq tələb olunur. (Ümumi balın 70%-ni təşkil edir).

4. Danışma (15 dəqiqə)  
- 1-ci hissə: 3 suala cavab verilir.  
- 2-ci hissə: Verilmiş şəkil təsvir edilir və şəkillə bağlı 2 suala cavab verilir.  
- 3-cü hissə: Mövzu üzrə çıxış edilir və təqdim olunmuş fikirlərdən ən azı ikisinə münasibət bildirilir. 
 
Qeyd edək ki, növbəti bloka keçdikdən sonra əvvəlki blokda dəyişiklik etmək mümkün deyil. İmtahan nəticələri emal olunduqdan sonra iştirakçıların qeydiyyat zamanı göstərdikləri e-mail ünvanına göndərilir. İştirakçıların məlumatlarının konfidensiallığı qorunacaq. 
DİM Azərbaycan Yazıçılar Birliyinin üzvlərini, elm adamlarını, xüsusilə müəllimləri bu imtahanda iştirak etməyə dəvət edir. 
İstifadəçilər bu link vasitəsilə platformada qeydiyyatdan keçərək ödənişsiz şəkildə sınaq prosesində iştirak edə bilərlər.