ATİAHİ-nin Bakı şəhəri Xətai Rayon Komitəsinin yeni sədri seçilib

ATİAHİ-nin Bakı şəhəri Xətai Rayon Komitəsinin yeni sədri seçilib

Azərbaycan Təhsil İşçiləri Azad Həmkarlar İttifaqının Bakı şəhəri Xətai Rayon Komitəsinin yeni sədri seçilib.

“Azərbaycan müəllimi” xəbər verir ki, yeni sədr Sehran Səfərovdur.

Sehran İxtiyar oğlu Səfərov 1979-cu ildə Masallı rayonunda anadan olub. O, 1996-2000-ci illərdə Bakı Dövlət Universitetinin Sosial Elmlər və Psixologiya fakültəsində fəlsəfə ixtisası üzrə bakalavr təhsili alıb.

2003-cü ildə AMEA-nın Fəlsəfə, Sosiologiya və Hüquq İnstitutunda işləyib. 2010-2012-ci illərdə Sumqayıt Dövlət Universitetinin Tarix fakültəsində “Azərbaycanda siyasi proseslər” ixtisası üzrə magistratura təhsili alıb.

2004-2020-ci illər ərzində dövlət təhsil sahəsi ilə paralel olaraq özəl təhsil sahəsində də həm müəllim, həm də rəhbər kimi fəaliyyət göstərib. Bununla yanaşı, jurnalistlik fəaliyyətini də davam etdirib. 2014-2018-ci illərdə AMEA-nın Tarix və Etnologiya İnstitutunun “Azərbaycanın beynəlxalq əlaqələr tarixi” şöbəsində qiyabi doktorantura təhsili alıb və kiçik elmi işçi kimi çalışıb. Dissertasiya mövzusuna dair bir neçə elmi məqaləsi və konfrans materialları yerli və beynəlxalq jurnallarda dərc olunub.

2020- 2024-cü ilərdə Elm və Təhsil Nazirliyinə tabe “Azərbaycan dili və ədəbiyyat tədrisi” elmi-metodik jurnalında müxbir redaktor və baş redaktor vəzifələrində çalışıb

2024-cü ilin oktyabr ayından 2025-ci ilin aprel ayına qədər Azərbaycan Təhsil İşçiləri Azad Həmkarlar İttifaqı (ATİAHİ) Respublika Komitəsinin “Mətbuat və İctimaiyyətlə Əlaqələr Şöbəsi”ndə aparıcı mütəxəssis və baş mütəxəssis vəzifələrində çalışıb.

Sehran Səfərov 2010-cu ildə Elm və Təhsil Nazirliyi tərəfindən “Qabaqcıl Təhsil İşçisi” döş nişanı ilə təltif olunub. 2024-cü ildə Elm və Təhsil naziri Emin Əmrullayevin müvafiq əmrinə əsasən, mətbuat sahəsindəki səmərəli fəaliyyətinə görə “Fəxri Fərman”la, eləcə də Azərbaycan Təhsil İşçiləri Azad Həmkarlar İttifaqı Respublika Komitəsinin (ATİAHİ) sədri Araz Paşayev tərəfindən işindəki səmərəli fəaliyyətinə görə "Təşəkkürnamə" ilə təltif olunub.

İngilis dili biliyi üzrə bir sıra beynəlxalq sertifikata malikdir.

Ailəlidir, üç övladı var.