Məktəblilərdən “Ən yaxşı təqdimat” – Reportaj

Məktəblilərdən “Ən yaxşı təqdimat” – Reportaj

Məktəbəqədər və Ümumi Təhsil üzrə Dövlət Agentliyinin inzibati binası. Ulu Öndər Heydər Əliyevin doğum gününün 102-ci ildönümü ilə əlaqədar Elm və Təhsil Nazirliyinin keçirdiyi “Ən yaxşı təqdimat” müsabiqəsinin final mərhələsi başlayıb. Dəniz Həşimov təqdimatla çıxış edir. 

Mövzusu “Heydər Əliyevin təhsilə və mədəniyyətə verdiyi töhfələr”dir. Əslində, müsabiqə şərtlərinə uyğun olaraq Ümummilli Liderin fəaliyyətinə dair 5 mövzu üzrə hazırlaşıb. Dahi şəxsiyyətin doğulduğu dövrə, ilk dəfə Azərbaycanda hakimiyyətə gəldiyi illərə, müstəqilliyin başladığı təlatümlü dönəmə qədər bütün mərhələləri araşdırıb.

“Özümü düşündüyüm kimi yüksək səviyyədə təqdim edə bilmədim”

Müsabiqəyə Şəkidən qatılan, rayondakı Qoxmuq kənd tam orta məktəbinin X sinif şagirdi olan Dəniz Həşimov komissiya qarşısında həyəcanlı görünür. Asan deyil, 5 nəfərdən ibarət komissiya üzvləri hər biri ayrı-ayrı suallar verərək onun tədqiqatında nə qədər dərinə getdiyi ilə maraqlanırlar. O da bütün suallara ətraflı cavab verməyə çalışır.

Komissiyanın sualları bitir, deyəsən, Dənizin öz-özünə verdiyi suallar başlayıb. Deyir, 16 səhifəlik təqdimat hazırlayıbmış: “Məktəbimizdə intellektual yarışlara qatılmışam. İlk dəfədir ki, məktəbimizdən kənarda, ölkə əhəmiyyətli bir yarışda iştirak edirəm. Müsabiqənin mənə özümü təqdim etmək imkanı verəcəyini düşünərək həvəslə iştirak etdim. Finala çatmağımla qürur duyuram. Amma mənə elə gəlir ki, özümü düşündüyüm kimi yüksək səviyyədə təqdim edə bilmədim. Harada səhv etdiyimi, hansı suala niyə cavab verə bilmədiyimi öz-özümə götür-qoy edirəm”.

“Nitqimdə problem vardı, düzəltdim, bu dəfə 3 əsas yerdən biri mənimdir”

Sırada Bakı məktəblisi Tərlan Əhədzadə var. O, komissiya qarşısına çıxmağa hazırlaşır. 264 nömrəli tam orta məktəbin X sinif şagirdi həm də Ailə, Qadın və Uşaq Problemləri üzrə Dövlət Komitəsi yanında fəaliyyət göstərən Uşaq Səfirlər Məclisinin üzvüdür. Bu yarışın finalında iştirak imkanı qazandığı üçün özünü xoşbəxt hiss edir: “Heydər Əliyevin fəaliyyətinin ən maraqlı dövrü, məncə, müstəqillik illəri olub. Mən də gənc olacağam, bəlkə də, ona görə Heydər Əliyevin gənclər siyasətini çox həvəslə araşdırdım. “Heydər Əliyev və azərbaycançılıq ideologiyası” mövzusu mənim üçün çox maraqlı oldu”.

Bundan əvvəl “Qərbi Azərbaycana qayıdış” müsabiqəsinə qatılıb bürünc medala layiq görülən məktəblinin bu yarışda da təcrübəsi var: “Ən yaxşı təqdimat” müsabiqəsində ötən il iştirak etdim, amma finala çıxa bilmədim. Səbəbi nitqimdə olan problemlər idi. Bu problemin üzərində çox işlədim və düzəltdiyimi düşünürəm. Bu dəfə 3 əsas yerdən biri mənimdir”.

“Özümü artıq qalib sayıram”

Balakən rayonu Nizami adına 1 nömrəli tam orta məktəbin IX sinif şagirdi Səadət Cerçiyeva “Doğma rayonum” mövzusunda çıxış edib. Dediyinə görə, 7 yaşından bəri qiraətlə məşğul olur, çox yarışa qatılıb, tədbirlərdə iştirak edib: “Heydər Əliyevlə bağlı şeirlər demişəm. “Heydər Əliyev irsini öyrənək” klubunun üzvüyəm. Təqdimat yarışına ilk dəfə qatılmışam. Hər kəsdə həyəcan olur, məncə, bu, normal haldır. Həyəcanıma baxmayaraq, uğur qazanacağımı düşünürəm. Hətta əksi olsa belə, nüfuzlu, ağıllı insanların qarşısında çıxış etmək imkanının özü də bir qələbədir. Odur ki, özümü artıq qalib sayıram”.

Balakən məktəblisi gələcək arzularının reallaşmasında qatıldığı müsabiqənin də payı olacağına inanır: “Nənəm jurnalist olub, mən də onun kimi olmaq istəyirəm. Vacib planlarımdan biri də ölkəmi xaricdə təmsil etməkdir. Bu arzularımın reallaşmasında “Ən yaxşı təqdimat” müsabiqəsinin faydalı olacağını düşünürəm”.

Çıxışının komissiyadan müsbət rəy aldığına inanır: “Komissiyadan müsbət rəy aldığımı düşünürəm. Onların təbəssümü, mənə ötürdükləri emosiya onu deməyə əsas verir ki, çıxışımı bəyəniblər”.  

Valideyn: ““Ən yaxşı təqdimat” müsabiqəsində iştirakı qızımı ən böyük arzusuna daha da yaxınlaşdıracaq”.  

Səadət Balakəndən anası Rəna İsayeva ilə gəlib. Özü də müəllim olan Rəna İsayeva burada olmaqdan qürur duyur: “Valideyn kimi çox böyük həyəcanla gözləyirəm. Çox gözəl bir həyəcandır. Qızım 9 yaşından qiraətlə məşğul olur. Hətta Rusiyada beynəlxalq yarışda iştirak edərək II yeri qazanıb. Çox yarışların qalibi kimi regionda onu yaxşı tanıyırlar. II Qarabağ müharibəsi başlamazdan bir neçə ay əvvəl yazdığı “Qarabağ” şeiri ilə məşhurlaşıb. 10 yaşında dediyi bu şeir böyük əks-səda doğurdu. Ermənilər bu ifasının paylaşımlarına çoxsaylı şərhlər yazmışdılar. Şərhlərdə “Sən Qarabağı görməyəcəksən” deyirdilər. Qələbədən sonra Səadət “Qalibiyyət dastanı” şeirini hazırladı, bu şeirlə Uşaq İncəsənət Festivalının qalibi oldu”.

Anasının sözlərinə görə, rus bölməsində təhsil alan Səadət üçün Azərbaycan dilində tarixdən danışmaq heç də asan deyil: “O, gecəsini gündüzünə qataraq bu çətinliyi aşıb. Bu müsabiqədə uğur qazanacağına inanıram. Artıq IX sinif şagirdidir. Bir neçə il sonra III ixtisas qrupu üzrə ali təhsil müəssisələrinə qəbul imtahanlarına qatılacaq. Ən böyük amalı ölkəsini təmsil etməkdir. Qızımın çox gözəl, zəngin daxili dünyası var”.

Rəna xanım qızına hər zaman dəstək olacağını deyib: “Qızımla fəxr edirəm. Ümid edirəm ki, şansı da onun üzünə gülər və bu müsabiqənin qalibi olar. Bütün uğurları özünün bacarıqlarının sayəsindədir, mən də onun dəstəkçisiyəm. Ona, onun bacarığına inanıram. Artıq ingilis dilini də öyrənməyə başlayıb. İstəyir ki, ölkəsini, sadəcə, ana dilində, rus dilində deyil, həm də ingilis dilində təbliğ və təmsil etsin. Fikrincə, “Ən yaxşı təqdimat” müsabiqəsində iştirakı onu bu arzusuna daha da yaxınlaşdıracaq”.  

Vəfa Yaqubova: “Təqdimetmədə şablon yanaşmalar hiss olunur”

Komissiyada təmsil olunan Məktəbəqədər və Ümumi Təhsil üzrə Dövlət Agentliyində direktor müavini Vəfa Yaqubova “Azərbaycan müəllimi”nə açıqlamasında bildirib ki, ötən illə müqayisədə bu il şagirdlər daha hazırlıqlıdırlar: “III ildir ki, müsabiqədə iştirak haqqında müraciət onlayn qaydada həyata keçirilir. Bu il müsabiqəyə rekord sayda, yəni 3900-ə yaxın məktəbli qatılıb. Onlardan 95 nəfəri final mərhələsinə dəvət olunub: “Yaxşı hal odur ki, şagirdlər Ulu Öndərin irsini dərindən öyrənib gəlirlər. Amma bizim bir istəyimiz də var ki, şagirdlərimiz müasir Azərbaycan tarixini yaxşı bilsinlər. Çünki Ulu Öndərin fəaliyyətini müasir Azərbaycan tarixi kontekstində təqdim etmək daha dərin biliklərdən xəbər verir”.

V.Yaqubova iradını da bildirib: “Komissiya üzvü kimi, əsas iradım şagirdlərimizin nitqi ilə bağlıdır. Orfoepiya qaydalarına riayət etməmələri, şablon ifadələrdən istifadə etmələri şagirdlərin çıxışını xeyli zəiflədir. Növbəti illərdə rayon mərhələlərində iştirak zamanı rayon komissiyalarına bu məsələlərə diqqətli yanaşmağı xahiş edərdik”.

V.Yaqublu bildirib ki, bu müsabiqədə onları daha çox şagirdlərin biliyi, Heydər Əliyev irsini nə qədər dərindən bildikləri maraqlandırır: Bu bilik onların şəxsi inkişafına nə qədər sirayət edir. Təqdimetmədə isə şablon yanaşmalar hiss olunur”.

Mirzə Cəfərzadə: “Hesab edirik ki, bu müsabiqədə iştirak belə şagirdlərin təhlil bacarıqlarının inkişafına kömək edir”

Komissiya üzvlərindən biri Azərbaycan Respublikası Təhsil İşçiləri Azad Həmkarlar İttifaqı (ATİAHİ) Respublika Komitəsinin sədr müavini Mirzə Cəfərzadə “Azərbaycan müəllimi”nə bildirib ki, məktəblilər Heydər Əliyevin həyat və fəaliyyətini tədqiq edir, müəllimlərinin yönləndirməsi, dəstəyi ilə dahi şəxsiyyəti araşdırırlar: “Biz də şagirdlərimizi burada dinləyir, Ümummilli Liderin fəaliyyətinə onların gözü ilə baxır, dahi şəxsiyyətin siyasi addımlarına məktəbli düşüncəsi ilə yanaşmağa çalışır, liderimizi onların baxdıqları prizmadan görməyə çalışırıq. Təbii ki, bu zaman lazım gələrsə, şagirdlərə tövsiyələr də verir, yanlışlarını düzəltməyə çalışır, doğrularını təqdir edir və qiymətləndiririk. Məktəblilər arasında təqdimat, tədqiqat və təhlil bacarıqları ilə fərqlənənlər çoxdur”.

M.Cəfərzadə müsabiqənin məqsədlərindən də danışıb: “Təqdimatların dinlənilməsində məqsədimiz odur ki, şagirdlərimiz oxuduqları, öyrəndikləri barədə sərbəst danışsınlar, bu zaman nitq qabiliyyətlərinin inklişafına, söz ehtiyatlarını artırmağa çalışsınlar. Hesab edirik ki, bu müsabiqədə iştirak belə onların təhlil bacarıqlarının inkişafına kömək edir”. 

M.Cəfərzadənin sözlərinə görə, müsabiqəyə qatılan şagirdlər arasında artıq tələbə kimi gördükləri belə var: “Şagirdləri dinləyərkən elələri olur ki, onları tələbə kimi görürük. Təqdimatlarından hiss olunur ki, arzuladıqları ixtisas üzrə tələbə adı qazanacaqlar. Hər gün 12 şagirdin təqdimatını dinləyirik”.

Finalda 94 şagird yarışır

Beləliklə, artıq 3 gündür Məktəbəqədər və Ümumi Təhsil üzrə Dövlət Agentliyinin inzibati binasında “Ən yaxşı təqdimat” müsabiqəsinin final mərhələsi keçirilir. Elm və Təhsil Nazirliyinin hər il Ulu Öndərin anadan olmasının ildönümü ilə əlaqədar olaraq təşkil etdiyi ikimərhələli müsabiqənin ilk mərhələsində mübarizə rayon səviyyəsində aparılır. 

Hər rayon üzrə seçilən məktəblilər hazırda davam edən final mərhələsində yarışırlar. Final mərhələsində 94 şagird iştirak edir. Ölkəmizin ayrı-ayrı rayonlarından və paytaxtdan qatılan məktəblilər 5 nəfərdən ibarət komissiya qarşısında çıxış edərək Ümummilli Lider Heydər Əliyevin fəaliyyəti ilə bağlı ən dərin biliyə sahib olduqların göstərməyə çalşır, hazırlaşdıqları 5 mövzudan komissiyanın seçdiyi bir mövzu əsasında çıxış edirlər.

Müəyyənləşdirilmiş meyarlar əsasında qiymətləndirilən qaliblər diplom və qiymətli hədiyyələrlə təltif olunurlar.