Botanika İnstitutu ilə Tumen Dövlət Universiteti arasında memorandum imzalanıb

Botanika İnstitutu ilə Tumen Dövlət Universiteti arasında memorandum imzalanıb

BMT-nin İqlim Dəyişmələri üzrə Çərçivə Sazişinin Tərəflər Konfransının 29-cu Sessiyasında (COP29) iştirak etmək üçün ölkəmizdə səfərdə olan Tumen Dövlət Universitetinin birinci prorektoru Andrey Viktoroviç Tolstikov Botanika İnstitutunun qonağı olub. 

İnstitutdan “Azərbaycan müəllimi”nə bildirilib ki, səfər çərçivəsində təşkil olunan işgüzar görüşün məqsədi Botanika İnstitutu ilə əməkdaşlıq imkanlarının müzakirəsi və memorandumun imzalanması olub.

Botanika İnstitutunun baş direktoru, b.e.d., professor Səyyarə İbadullayeva görüş zamanı qonağa Botanika İnstitutun elmi-tədqiqat istiqamətləri, beynəlxalq əlaqələri, həyata keçirilən layihələr haqqında məlumat verib və əməkdaşlıq əlaqələrinin qurulması perspektivləri müzakirə olunub. Qonaq Ínstitutun elmi fəaliyyətini yüksək qiymətləndirərək qarşılıqlı kadr və təcrübə mübadiləsi üçün geniş imkanların olduğunu vurğulayıb.

Alim İnstitutun Herbari Fondunda olub, herbari nümunələrin saxlanılma şəraiti və aparılan müasir istiqamətli işlərlə maraqlanıb.

Səfər müddətində Tumen Dövlət Universiteti və AR ETN Botanika İnstitutu arasında elmi tədqiqat işlərinin aparılmasına dair memorandum imzalanıb.

 Memoranduma əsasən elm və təhsil sahəsində əməkdaşlıq, yüksək ixtisaslı mütəxəssislərin hazırlanması, yeni texnologiyaların tətbiqi, layihələrin və s. həyata keçirilməsi nəzərdə tutulub. Sənəd yeni elmi istiqamətlər üzrə gənc kadrların hazırlanması üçün əhəmiyyətli olacaq.