Bakı Avrasiya Universiteti ilə Milli Observatoriya arasında Anlaşma Memorandumu imzalanıb

Bakı Avrasiya Universiteti ilə Milli Observatoriya arasında Anlaşma Memorandumu imzalanıb

2025-ci ilin 22 aprel tarixində Bakı Avrasiya Universiteti (BAAU) ilə Azərbaycan Respublikası Əmək və Əhalinin Sosial Müdafiəsi Nazirliyinin tabeliyində Əmək Bazarı və Sosial Müdafiə Məsələləri üzrə Milli Observatoriya rəhbər heyəti arasında görüş keçirilib. 

Milli Observatoriyanın İdarə Heyətinin sədri Elnur Səfərli çıxışında qurumun fəaliyyəti, xidmətləri haqqında məlumat verib. O, ali təhsil müəssisələri və analitik araşdırma mərkəzləri ilə səmərəli əməkdaşlığın əmək bazarının formalaşmasında mühüm rol oynadığını vurğulayıb və BAAU ilə qurulan əməkdaşlığın bu istiqamətdə faydalı olacağına əminliyini bildirib. Sədr, həmçinin qeyd edib ki, universitet məzunlarının məşğulluq göstəricilərinin hərtərəfli araşdırılması, bu araşdırmalar nəticəsində məzunların iş dünyasına inteqrasiyası və peşəkar bacarıqlarının əmək bazarının tələblərinə uyğunluğunun qiymətləndirilməsi Milli Observatoriyanın əsas fəaliyyət istiqamətlərindəndir.

BAAU-nun rektoru dosent Səyavuş Qasımov isə universitetin maddi-texniki bazası, tələbə qəbulu aparılan ixtisaslar və təhsil səviyyələri haqqında məlumat verərək, ali təhsil müəssisəsinin elmi və akademik potensialını gücləndirmək məqsədilə həyata keçirilən strateji təşəbbüslərdən danışıb. O, universitetin innovativ tədqiqat mərkəzinə çevrilməsi üçün yeni elmi proqramların tətbiqinə dair ardıcıl və məqsədyönlü addımlar atıldığını qeyd edib.

Sonra BAAU ilə Milli Observatoriya arasında əməkdaşlığa dair Anlaşma Memorandumu imzalanıb. Anlaşma Memorandumunu Səyavuş Qasımov ilə Elnur Səfərli imzalayıb.

Sənəddə BAAU-nun məzunlarının əmək bazarına adaptasiya vəziyyətinin təhlil edilməsi, əmək bazarının kəmiyyət və keyfiyyət parametrləri nəzərə alınmaqla, perspektiv peşə və ixtisaslara, zəruri bacarıqlara və səriştələrə olan tələbatın proqnozlaşdırılması sahələrində əməkdaşlıq edilməsi, birgə tədqiqatların aparılması, elmi-praktiki konfransların, simpoziumların və digər tədbirlərin keçirilməsi əksini tapıb.

Görüşün sonunda əməkdaşlığın istiqamətləri ilə bağlı müzakirələr aparılıb.