MEK əməkdaşları "Rumyansev oxumaları – 2025" adlı beynəlxalq elmi-praktik konfransa qatılıblar

MEK əməkdaşları "Rumyansev oxumaları – 2025" adlı beynəlxalq elmi-praktik konfransa qatılıblar

Müstəqil Dövlətlər Birliyinə (MDB) üzv ölkələrin Dövlətlərarası Humanitar Əməkdaşlıq Fondunun dəstəyi ilə Rusiya Federasiyasının Mədəniyyət Nazirliyi, Rusiya Dövlət Kitabxanası və Avrasiya Kitabxanalar Assambleyasının təşkilatçılığı ilə Rusiya Dövlət Kitabxanasında "Rumyansev oxumaları – 2025" beynəlxalq elmi-praktik konfransı keçirilib.

Konfrans çərçivəsində Böyük Vətən Müharibəsində Qələbənin 80 illiyinə həsr olunmuş MDB ölkələrinin kitabxanalarının iştirakı ilə "Şücaət səhifələri" adlı xüsusi sessiya təşkil olunub. Birlik ölkələrinin kitabxanalarının nümayəndələrinin iştirakı ilə keçirilən xüsusi sessiyanın işi iki gün davam edib. Sessiyada Azərbaycan, Belarus, Qazaxıstan, Qırğızıstan, Rusiya, Tacikistan, Özbəkistan və Abxaziyadan 33 mütəxəssis şəxsən iştirak edib.

Azərbaycan Milli Elmlər Akademiyasının Mərkəzi Elmi Kitabxanasını bu tədbirdə Komplektləşdirmə şöbəsinin baş kitabxanaçısı Xədicə Ağayeva təmsil edib və "AMEA-nın Mərkəzi Elmi Kitabxanası Böyük Vətən Müharibəsi illərində" mövzusunda təqdimatla məruzə edib.

Bundan əlavə, MEK-in Kitabxana işləri üzrə direktor müavini, filologiya üzrə fəlsəfə doktoru, dosent Şəhla Quliyeva və Komplektləşdirmə şöbəsinin müdiri Gülnar Məmmədova sessiyaya onlayn qatılaraq "AMEA-nın Mərkəzi Elmi Kitabxanasının elektron resurslarla komplektləşdirilməsi" mövzusunda məruzə ediblər.

Sessiya çərçivəsində 1941–1945-ci illərin faciəli və qəhrəmanlıq dolu hadisələrinə həsr olunmuş 28 təqdimat dinlənilib, iştirakçı ölkələrin kitabxanalarında qorunan qəzet, illüstrasiya, arxiv, təbliğat, kino və digər materiallar araşdırılıb.

Xüsusi sessiyanın ikinci günündə MEK əməkdaşı Böyük Vətən Müharibəsi qəhrəmanlarının xatirəsinə həsr olunmuş tədbirdə də iştirak edib.