Dünya azərbaycanlıları Xankəndidə bir araya gələcəklər

Dünya azərbaycanlıları Xankəndidə bir araya gələcəklər

Azərbaycan Respublikasının Diasporla İş üzrə Dövlət Komitəsinin və Heydər Əliyev Fondunun birgə təşkilatçılığı ilə Diaspor Gənclərinin Vl Yay Düşərgəsi təşkil ediləcək.

Dövlət Komitəsindən “Azərbaycan müəllimi”nə bildirilib ki, avqustun 3-9-da Xankəndidə keçiriləcək builki düşərgənin şüarı Prezident İlham Əliyevin “Azərbaycan Respublikasında 2025-ci ilin “Konstitusiya və Suverenlik İli” elan edilməsi haqqında” Sərəncamına uyğun olaraq “Konstitusiya və Suverenlik İli”dir.

Düşərgədə dünyanın müxtəlif ölkələrində yaşayan 100-dən çox azərbaycanlı gəncin, o cümlədən ölkəmizə dost münasibət bəsləyən xalqların nümayəndələrinin iştirakı nəzərdə tutulur.

Gənclər düşərgə müddətində Xankəndinin, eləcə də Qarabağın tarixi, mədəni abidələri ilə tanış olmaq, şəhid ailələrinin üzvləri və qəhrəman qazilərimizlə, həmçinin müxtəlif sahələr üzrə ekspertlərlə görüşmək, eləcə də əylənmək və intellektual oyunlarda iştirak etmək imkanı qazanacaqlar.

Qeyd edək ki, düşərgəyə Azərbaycan dilində ünsiyyət bacarığı olan 18-29 yaş arası gənclər qeydiyyatdan keçə bilərlər. Əvvəlki düşərgələrdə iştirak etmiş gənclərin təkrar iştirakı nəzərdə tutulmur. Gənclərin düşərgədə iştirak xərcləri qarşılanacaq.

İştirak etmək istəyən şəxslər www.diaspor.gov.az/qeydiyyat səhifəsində yerləşdirilmiş onlayn anket formasını mayın 31-dək tam olaraq doldurub göndərməlidirlər. Seçim prosesi iki mərhələdə - müraciətlərin qəbulu və videomüsahibələr formasında keçiriləcək.

Qeydiyyat, proqram, iştirakçıların seçim prosesi və digər yeni məlumatları əldə etmək üçün www.diaspor.gov.az saytını mütəmadi diqqətdə saxlamaq vacibdir.

Əlavə məlumat üçün:

E-mail: [email protected]

Tel.: +994 12 493 10 54

WhatsApp: +994 51 867 36 02

Xatırladaq ki, Diasporla İş üzrə Dövlət Komitəsi və Heydər Əliyev Fondunun birgə təşkilatçılığı ilə bu günə kimi Diaspor gənclərinin Şəki, Şamaxı, Şuşa, Naxçıvan və Laçın şəhərlərində beş yay düşərgəsi təşkil olunub. Həmin düşərgələrdə dünyanın 60-dan artıq ölkəsindən gənclər iştirak ediblər.