Türkiyənin 4 universiteti ilk top-100-lüyə daxil olmağı bacarıb – REYTİNQ

Türkiyənin 4 universiteti ilk top-100-lüyə daxil olmağı bacarıb – REYTİNQ

Beynəlxalq ali təhsil reytinq təşkilatı olan “Times Higher Education” (THE) Asiyanın ən yaxşı universitetlərinin 2025-ci il üçün reytinqini dərc edib. 

“Azərbaycan müəllimi” xəbər verir ki, 35 ölkə və bölgədən 853 universitetin 18 fərqli kateqoriyada araşdırma, tədris, bilik transferi və beynəlxalq əlaqələr üzrə  qiymətləndirilməklə hazırlanan reytinqdə Türkiyə universitetlərinin uğurları diqqət çəkib. 

Türkiyənin 4 universiteti ilk 100-lüyə daxil olmağı bacarıb. ODTÜ 72-ci, Sabancı Universiteti 74-cü, Qoç Universiteti 79-cu, İTİ 97-ci yerdə qərarlaşıb. 27 universitet isə ilk 500-lüyə daxil olmağa müvəffəq olub. Boğaziçi Universiteti 123-cü, Bilkənt Universiteti 158-ci sırada olmaqla top-200-ə daxil olub. Beləliklə, Türkiyədən cəmi 6 universitet ilk 200-lükdə öz yerini tapıb.

İlk 500-lükdə yer alan digər Türkiyə universitetləri və onların reytinqləri belədir:

201-250 qrupu: Hacettepe Universiteti, Özyeğin Universiteti, Yıldız Texniki Universiteti;
251-300 qrupu: Bahçeşehir Universiteti, Kadir Has Universiteti; 
301-350 qrupu: Çankaya Universiteti, Səlcuq Universiteti; 
351-400 qrupu: Akdeniz Universiteti, Atatürk Universiteti, Bartın Universiteti, İstanbul Cerrahpaşa Universiteti; 
401-500 qrupu: Anadolu Universiteti, Ege Universiteti, Erciyes Universiteti, Qazi Universiteti, Gebze Texniki Universiteti, İstanbul Universiteti, İstinye Universiteti, Necmettin Erbakan Universiteti, TOBB İqtisadiyyat və Texnologiya Universiteti, Yaşar Universiteti.
Reytinqdə cəmi 111 türk universiteti yer tapıb.

“Daha yüksək nöqtələrə çatacağıq”

Türkiyənin Ali Təhsil Şurasının sədri Erol Özvar xüsusilə son illərdə Türkiyə universitetlərinin artan uğurlarının beynəlxalq reytinqlərdə də özünü göstərdiyini bildirib və bundan məmnunluqlarını ifadə edib. Türkiyə universitetlərinin potensialının daha da yüksək olduğunu vurğulayan E.Özvar xüsusilə qeyd edib: “Beynəlmiləlləşməyə, akademik məhsuldarlığa və tədqiqatların keyfiyyətinə diqqət yetirməklə beynəlxalq reytinqlərdə daha çox universitetlə təmsil olunacağımıza və daha yüksək nöqtələrə çatacağımıza inanıram”.