Emin Əmrullayev: Hazırda yalnız 50%-dən az ölkə tədris proqramlarında iqlim dəyişikliyini əhatə edir

Emin Əmrullayev: Hazırda yalnız 50%-dən az ölkə tədris proqramlarında iqlim dəyişikliyini əhatə edir

“Bizim məqsədimiz yalnız yerli səviyyədə deyil, eyni zamanda beynəlxalq miqyasda əməkdaşlıq edərək, təhsilin yaşıllaşdırılmasına dəstək verməkdir”.

“Azərbaycan müəllimi” xəbər verir ki, bunu elm və təhsil naziri Emin Əmrullayev COP29 çərçivəsində "İnsan inkişafı və iqlim dayanıqlılığı üçün yaşıl təhsil mövzusunda nazirliklərarası dəyirmi masa - Yaşıl təhsil tərəfdaşlığı'nın 2-ci illik toplantısı"nda çıxışı zamanı bildirib.

UNESCO, OECD və digər beynəlxalq tərəfdaşlarla birgə çalışaraq, təhsil sistemlərini daha dayanıqlı və davamlı etmək üçün müxtəlif təşəbbüslər həyata keçiririk. Bu məqsədlə tədris proqramlarının və məktəblərin yaşıllaşdırılması, iqlim dəyişikliyi mövzusunda maarifləndirmə səviyyəsini artırmağa kömək edir.

Əlavə olaraq, COP29-da biz iqlim dəyişikliyinin PISA qiymətləndirmələrinə daxil edilməsi ilə bağlı təklif verdik. Bu layihə tələbələrin iqlim mövzusuna yanaşmalarını və bu mövzuda nə dərəcədə maraq göstərdiklərini anlamağa kömək edəcək.

Təhsil sistemimizdə iqlim dəyişikliyinin əhəmiyyəti artmalı, dezinformasiya ilə mübarizə və doğru tədris strategiyaları ilə gəncləri gələcək çətinliklərə hazırlamaq üçün effektiv yanaşmalar təqdim edilməlidir.

Dünya miqyasında iqlim təhsilini inkişaf etdirmək və gəncləri bu sahədə liderliyə hazırlamaq üçün daha çox işlər görülməlidir. Hazırda yalnız 50%-dən az ölkə tədris proqramlarında iqlim dəyişikliyini əhatə edir, amma bu statistikada ciddi dəyişikliklərə ehtiyac var.

Məqsədimiz hər bir tələbəni iqlim hərəkətində liderliyə təşviq etməkdir. Uşaqlarımız yalnız sabahın liderləri deyil, bu günün dəyişdiriciləridir. Onlara lazım olan alətləri və dəstəyi təqdim etməklə, hər birini müsbət dəyişikliklər yaratmağa yönəltməliyik.

Bu istiqamətdə tərəfdaşlıqlarımızı gücləndirərək, təhsilin davamlı və ədalətli gələcəyin qurulmasında mühüm rol oynamağa davam edəcəyik. Təhsilin və bu mühüm təşəbbüslərin önəmini bir daha vurğulayaraq, hər kəsi bu vacib işdə əməkdaşlıq etməyə çağırıram. Birlikdə daha yaşıl və davamlı gələcək üçün addımlar atmağa davam edəcəyik.