Bərdə məktəblisi olan qardaşlar: Biri qızıl, digəri bürünc medalçı oldu

Bərdə məktəblisi olan qardaşlar: Biri qızıl, digəri bürünc medalçı oldu

Qalibiyyət, medal sevinci, həyəcan - bunları evlərinə, şagirdi olduqları təhsil ocağına ikiqat yaşadan qardaşlar Murad və Hidayət Quliyevlərdir.

Respublika Fənn Olimpiadasının qalibi olan hər iki qardaş Bərdə şəhəri akademik Zərifə Əliyeva adına Texniki fənlər təmayüllü liseydə təhsil alır. 

Murad 10-cu, Hidayət isə 9-cu sinif şagirdidir. 

İlk olaraq Muradla söhbətə başlayırıq. 

O, Respublika Fənn Olimpiadasında (RFO) fizika fənni üzrə 3-cü yerin qalibi olub. Bundan əvvəlki ildə də RFO-da final mərhələsinə yüksələrək uğurlu nəticə göstərib. 

Murad deyir ki, ötən il qələbə qazanmasa da, bu il öz üzərində daha çox çalışıb. Final mərhələsində topladığı bala əsasən bürünc medala layiq görülüb. 

"Olimpiada başlayanda çox həyəcanlı idim. Amma məndən gözləntisi olan insanlar var. Bu gözləntiləri doğrultmaq üçün əlimdən gələn qədər çalışdım. Nəticəmə görə çox sevinirəm".

Qeyd edək ki, Murad 2024-cü ildə 9-cu siniflər üçün təşkil olunan buraxılış imtahanında ən yüksək nəticə göstərərək 300 bal toplayıb.

Qızıl medal sahibi olan Hidayət ötən tədris ilində Respublika Fənn Olimpiadasında fizika fənnindən 3-cü yeri tutub. Bu il isə 1-ci yerin sahibi olaraq  qızıl medala layiq görülüb. 

Hidayət çox danışmağa meyilli deyil,  utancaqlığı hiss olunur. Sadəcə bir cümlə ilə kifayətlənir: "Mən sözümü imtahanda deyəcəm!" 

Bu məlumatları alarkən hər iki qardaş növbəti bilik yarışından çıxmışdı. Nəticələrinin bu dəfə də yüksək olacağına inanırdılar. Necə deyərlər, qazandıqları yüksək nəticələr onları arzuları olan həkimliyə daha da yaxınlaşdırır.