ICESCO-nun Baş direktoru: Təhsil sisteminin yaşıl transformasiyasını təcili həyata keçirməliyik

ICESCO-nun Baş direktoru: Təhsil sisteminin yaşıl transformasiyasını təcili həyata keçirməliyik

ICESCO-nun Baş direktoru Salim bin Məhəmməd Əl-Malik çıxışında iqlim dəyişikliyinin təhsil sistemlərinə təsirlərindən danışıb:

“İqlim dəyişikliyinin təsirləri həyatımıza və humanitar sistemlərə dərin təsir edir. Bu təsirlər təkcə iqtisadi xərclərlə məhdudlaşmır, həm də təhsil sistemlərimizi ciddi şəkildə təsirləndirir. Təəssüf ki, təxminən 100 ölkənin yarısı iqlim dəyişikliyini milli təhsil çərçivələrinə daxil etməyib. Yaşıl təhsilin inkişafı üçün təcili tədbirlər görməliyik".

O həmçinin qeyd edib ki, ICESCO Cambridge Universiteti ilə əməkdaşlıq çərçivəsində “Yaşıl Təhsil üzrə Yol Xəritəsi” hazırlayıb. Bu sənəd üzv ölkələrə iqlim dəyişikliyi ilə mübarizədə təhsilin rolunu gücləndirmək üçün qısa və uzunmüddətli hədəflər təklif edir.

"Yaşıl təhsil göstəriciləri üzrə qlobal izləmə platforması" gələn il istifadəyə veriləcək və bu, hökumətlərə iqlim hədəflərinə çatmaqda dəstək olacaq.

Birlikdə çalışaraq, biliklərimizi bölüşərək və bir-birimizi dəstəkləyərək təhsil sahəsində davamlı və inklüziv bir mənzərə yarada bilərik", – deyə Baş direktor əlavə edib.

“Azərbaycan müəllimi” xəbər verir ki, bunları ICESCO-nun Baş direktoru Salim bin Məhəmməd Əl-Malik Bakıda COP29 çərçivəsində "İnsan inkişafı və iqlim dayanıqlılığı üçün yaşıl təhsil mövzusunda nazirliklərarası dəyirmi masa - Yaşıl təhsil tərəfdaşlığı'nın 2-ci illik toplantısı"nda çıxışı zamanı deyib.