“Tanınmış müəllim olmaq istəyirəm” – Gimnastın uğur hekayəsi

“Tanınmış müəllim olmaq istəyirəm” – Gimnastın uğur hekayəsi 

Türkan Həsənli Bakı şəhəri 238 nömrəli tam orta məktəbin IX sinif şagirdidir. 10 ildən çoxdur ki, bədii gimnastika ilə məşğul olur. Yerli və xarici yarışlarda nailiyyətlər qazanıb.

İlk dəfə 6 yaşında yarışa çıxdı, II yeri tutdu

Türkan körpəliyindən yaxşı gimnast olacağının siqnalını verirmiş. Anasının sözlərinə görə, 3 yaşlı qızı həm elastik idi, həm də zərif: “Qərara gəldim ki, Türkandan gözəl gimnast olar. Özüm də gimnastları çox sevirdim. Bədii gimnastikaya xüsusi marağım olduğundan düşüncələrimi əmələ çevirdim. Türkanı yaxınlığımızda fəaliyyət göstərən kluba apardığım 1 il ərzində çox şey dəyişdi və bir gün klubda müəllimi təklif etdi ki, onu peşəkar kluba göndərək, orda yarışlara çıxsın. Qızım 2016-cı ildə 6 yaşında ilk dəfə yarışa çıxdı və II yeri tutdu. Artıq 10 ildən çoxdur ki, bədii gimnastika ilə məşğul olur və onun bu məşğuliyyəti həyatımızın bir parçasına çevrilib”. 

Dubayda ip salladı, gürz oynatdı...

Xarici ölkələrdə beynəlxalq yarışlara qatılan Türkan üçün böyük nailiyyətlər 2018-ci ildən başlayıb. Məsələn, Dubayda gürzlərlə və iplə çıxış edərək ikinci yerə layiq görülüb. Macarıstan, Gürcüstan, Qazağıstan, İsveçrədə keçirilən yarışlarda iştirak edib təcrübə qazanan balaca gimnastın gözü yuxarıda, hədəfi zirvələrdir.

Riyaziyyatı da sevir, xəyalında mühasib olmaq da var 

Türkan “həftədə 3 dəfə bədii gimnastika ilə məşğul oluram”, – deyir. Dərslərini də yaxşı oxuyur, əlaçıdır. O, dəqiq fənləri daha çox xoşlayır və riyaziyyat ən sevdiyi fəndir: “Riyaziyyat insana hər yerdə lazımdır, gimnasta da. Riyazi bacarığım olmadan yarışlarda ballarımı sürətlə hesablaya bilmərəm”.

Türkanın xəyalında mühasib olmaq da var: “Əslində, idman müəllimi olacağam. Müəllimlərim məni necə hazırlayıblarsa, mən də öz şagirdlərimi elə hazırlayacam və onların yaxşı gimnast olmalarına çalışacağam”. 

Türkan yaxşı gimnast olmaqla kifayətlənməyəcək: “Məktəbi bitirib universitetə qəbul olacağam. Yaxşı müəllim kimi tanınmaq istəyirəm. Əsas hədəfim tanınmış müəllim olmaqdır”.