Şəhid övladları olan abituriyentlər Qarabağ Universiteti ilə tanış olublar

Şəhid övladları olan abituriyentlər Qarabağ Universiteti ilə tanış olublar

4-6 iyun 2025-ci il tarixlərində Xankəndidə keçirilən “Zəfər Sədası” intellektual yay düşərgəsi çərçivəsində şəhid övladları Qarabağ Universitetini ziyarət ediblər. 

“Azərbaycan müəllimi” xəbər verir ki, düşərgə “Zəfər” Şəhid Ailələrinə Dəstək İctimai Birliyinin təşkilatçılığı, Veysəloğlu Şirkətlər Qrupunun baş sponsorluğu və Qarabağ Universitetinin tərəfdaşlığı ilə baş tutub.

Şəhid övladları ilə görüşən Qarabağ Universitetinin rektoru Şahin Bayramov onları universitetdə görməkdən məmnunluq duyduğunu bildirib. O qeyd edib ki, bu torpaqlarda həyatın və təhsilin yenidən bərpası məhz qəhrəman şəhidlərimizin canı və qanı bahasına mümkün olub və onların övladlarını bu ali təhsil müəssisəsində qarşılamaq universitetin mənəvi borcudur.

Tədbirdə iştirak edən “Zəfər” Şəhid Ailələrinə Dəstək İctimai Birliyinin sədri Sevinc Orucova çıxış edərək, bu cür səfərlərin gənclərin yalnız təhsil imkanları ilə tanış olmasına deyil, həm də Qarabağla mənəvi bağlarının möhkəmləndirilməsinə xidmət etdiyini vurğulayıb.

Görüş çərçivəsində universitetin fakültələri, ixtisasları və qəbul prosesi barədə iştirakçılara ətraflı məlumat verilib, onların sualları cavablandırılıb.

Günün ikinci yarısında “Xəzər” İntellektual Gənclər Klubu tərəfindən şəhid övladları və Qarabağ Universitetinin tələbələrindən ibarət komandaların iştirakı ilə intellektual oyun keçirilib. Komandalar arasında dostluq ruhunda keçən yarışın sonunda qaliblərə Veysəloğlu Şirkətlər Qrupu tərəfindən hədiyyələr təqdim olunub.

Düşərgə proqramı Qarabağ Universitetinin İncəsənət fakültəsinin tələbələrinin təqdim etdiyi musiqili konsertlə başa çatıb. Konsert proqramı iştirakçılara unudulmaz və emosional anlar yaşadıb.