MÜTDA: “Rəqəmsal məktəb” platformasının nəticələri təhlil edilir

MÜTDA: “Rəqəmsal məktəb” platformasının nəticələri təhlil edilir

Müasir təlim texnologiyalarının tədris prosesinə inteqrasiyasının təmin edilməsi, interaktivlik və əlçatanlıq üçün ötən tədris ilində milli onlayn “Rəqəmsal məktəb” təhsil platforması fəaliyyətə başlayıb. Bəs bu platformanın fəaliyyəti növbəti tədris ilində necə təşkil ediləcək?

Bu barədə Məktəbəqədər və Ümumi Təhsil üzrə Dövlət Agentliyindən “Azərbaycan müəllimi”nin sorğusuna cavab olaraq bildirilib ki, ilkin mərhələdə “Rəqəmsal məktəb” platforması Bakı şəhərində yerləşən ümumi təhsil müəssisələrində test rejimində tətbiq edilib. 

Qeyd edilib ki, tədris ili bitdiyi üçün hazırda pilot rejimi dövrünün nəticələri təhlil edilir. Real rejimdə işləməsi üçün platformanın texniki imkanları araşdırılır. Bu mərhələ yekunlaşdıqdan sonra layihənin əhatə dairəsi ilə bağlı qərar veriləcək və ictimaiyyət bu barədə məlumatlandırılacaq.

Qeyd edək ki, sözügedən platformanın məqsədi təhsil sistemində müasir texnologiyaların tətbiqi ilə yanaşı, tədris və idarəetmə proseslərini təkmilləşdirmək, təhsildə şəffaflığı artırmaqdır.