NDU-nun 11 tələbəsi beynəlxalq mübadilə proqramında iştirak hüququ qazanıb

NDU-nun 11 tələbəsi beynəlxalq mübadilə proqramında iştirak hüququ qazanıb

Naxçıvan Dövlət Universitetinin tələbələri beynəlxalq mübadilə proqramında iştirak hüququ qazanıblar. 

NDU-dan “Azərbaycan müəllimi”nə bildirilib ki, universitetin 10 tələbəsi Hacettepe Universitetinə, 1 tələbəsi isə İstanbul Universiteti - Cerrahpaşaya təqaüdlü beynəlxalq mübadilə proqramına qəbul olunub.

Seçim prosesi zamanı tələbələrin akademik göstəriciləri əsas meyar kimi nəzərə alınıb. Eyni zamanda, universitet tərəfindən tələbələrə müvafiq hazırlıq prosesində lazımi dəstək göstərilib. 

Mübadilə proqramı çərçivəsində tələbələr 2025-2026-cı ilin ilk semestri ərzində Türkiyənin nüfuzlu ali təhsil müəssisələrində təhsil alacaq. Bu müddət onlara yeni bilik və bacarıqlar əldə etmək, beynəlxalq akademik mühitdə təcrübə toplamaq, eləcə də fərqli mədəniyyətlərlə tanış olmaq imkanı verəcək.

Qeyd edək ki, Naxçıvan Dövlət Universiteti beynəlxalq mübadilə strategiyası çərçivəsində tələbələrin xarici ali məktəblərdə təhsil imkanlarını artırmaq, qlobal akademik əməkdaşlıqları genişləndirmək və tələbələrin beynəlxalq təcrübə qazanmasına şərait yaratmaq istiqamətində fəaliyyətini davam etdirir.