Mühəndislikdə zərif güc: 50 qadın “Zərif Mühəndislər”lə real istehsalata addım atdı

Mühəndislikdə zərif güc: 50 qadın “Zərif Mühəndislər”lə real istehsalata addım atdı

Sevil Əliyeva Azərbaycan Texniki Universitetinin Mühəndislik fakültəsinin məzunudur. Bu gün daha bir “Məzun günü” yaşadı və “Zərif mühəndislər” təcrübə proqramının 50 məzunundan biri də o oldu: “Azərbaycan Texniki Universitetində həm bakalavr, həm də magistr təhsili almışam. “Ekologiya mühəndisliyi” ixtisası üzrə təhsilimi magistraturada “Neft-kimya sənayesi və ətraf mühitin mühafizəsi” ixtisası üzrə bu il uğurla başa vurmuşam. Hazırda ixtisasımdan fərqli bir sahədə işləyirəm, amma məqsədim öz ixtisasıma üzrə yönəlməkdir. Çünki ekologiya mühəndisliyi mənim üçün çox maraqlı sahədir və bu istiqamətdə işləmək arzusundayam. “Zərif mühəndislər”ə müraciət edəndə qəbul olunacağımı bilirdim. Universitetə həm bakalavriat, həm də magistratura səviyyəsinə yüksək balla, ödənişsiz qəbul olunmuşam. Bakalavr təhsilimi fərlənmə diplomu ilə başa vurmuşam. Bu göstəricilərə və ailəmin sosial vəziyyətinə görə mən “Zərif mühəndislər” təqaüd proqramına qəbul olunmuşam. Bu proqramda iştirak etmək istəyimin əsas səbəbi ekologiya mühəndisliyinin müasir və nadir ixtisaslardan biri olması idi. Çox vaxt mühəndislik proqramları neft, qaz və ya kimya sahələri üzrə olur. Amma burada ekologiya mühəndisliyi üzrə də şərtlərin nəzərə alındığını görəndə çox sevindim və müraciət etdim”.

“Mentorlarımızın verdiyi praktik biliklər bizim üçün çox faydalı oldu”

Sevil Əliyeva “Azərbaycan müəllimi”nə bildirib ki, STP-nin yaratdığı imkan sayəsində maraqlı təcrübə keçib: “Zavodlarda təcrübə keçdik. Xüsusilə STP Polimer zavodunda təcrübə zamanı keyfiyyətə nəzarət və SƏTƏM istiqamətində fəaliyyət göstərdik. Mentorlarımız bizə ətraflı şəkildə ölçmə, qüsurları aşkar etmə və keyfiyyətin necə yoxlanılması ilə bağlı praktik biliklər verdilər. Bu bizim üçün çox faydalı oldu. Əvvəlcə ekologiya mühəndisliyinin bu qədər perspektivli ola biləcəyini düşünmürdüm. Amma təhsil aldıqca və xüsusilə təcrübə müddətində başa düşdüm ki, bu sahə əsl mənim üçündür. Ona görə magistratura təhsilimi də bu istiqamətdə davam etdirdim”.

Bu ixtisası seçəndə də onun gələcəyin ixtisası olacağını bilirmiş: “Bu ixtisas müasir və gələcəyin ixtisasıdır. Kimya mühəndisliyi və digər sahələr daha geniş tanınsa da, ekologiya mühəndisliyinin gələcəkdə çox böyük əhəmiyyət daşıyacağına inanıram. Seçimimdən peşman deyiləm. Gələcəkdə də ixtisasım üzrə yaxşı bir işdə çalışacağıma ümid edirəm”.

573 nəfər müraciət edənin yalnız 50-si məzun olub

“Zərif mühəndislər” təcrübə proqramının 50 iştirakçısının məzun olması münasibətilə keçirilən “Məzun günü”ndə Təhsilin İnkişafı Fondunun rəhbəri Elnur Nəsibov, “Vektor” şirkətlər qrupunun baş insan resursları və təşkilati inkişaf inzibatçısı Şölə Əliyeva da  iştirak ediblər.
Tədbirdə Təhsilin İnkişafı Fondunun Layihələrin idarə olunması şöbəsinin aparıcı mütəxəssisi Almaz Axundzadə məlumat verib ki, "Zərif mühəndislər" təcrübə və təlim proqramlarından yararlanmaq imkanı verib. Proqrama ümumilikdə 573 müraciət daxil olub, 105 namizəd müsahibə mərhələsinə dəvət edilib. Seçim prosesinin sonunda 50 nəfər iştirakçı kimi təsdiqlənib.

“Zərif mühəndislər” nəzəri biliklərini real istehsalat şəraitində  tətbiq ediblər

Onun sözlərinə görə, proqram iştirakçıları kimya, kompüter, neft-qaz, proseslərin avtomatlaşdırılması, ekologiya, robot texnikası, elektrik, mexanika mühəndisliyi, geofizika və geodeziya mühəndisliyi üzrə 10 müxtəlif ixtisasda STP-də zavod və istehsalat təcrübəsi qazanaraq nəzəri biliklərini real istehsalat şəraitində tətbiq ediblər: “Proqram mühəndis qızlarımız üçün yalnız akademik dəstək deyil, həm də şəxsi inkişaf imkanları yaradıb. İştirakçılar üçün mentor dəstəyi, TİF tərəfindən karyera planlaşdırılması, peşəkar bacarıqlarını gücləndirmə fürsəti təmin edilib. Bundan əlavə, gənc mühəndislərimiz üçün ingilis dili və “Microsoft Excel” üzrə təlim kursları, həmçinin ödənişsiz platformalara giriş imkanı yaradılaraq onların qlobal və analitik bacarıqlarının artırılmasına töhfə verib”.

Almaz Axundzadə əlavə edib ki, proqramın nəticəsi olaraq artıq məzunlardan 19 nəfər müxtəlif sahələrdə öz karyera fəaliyyətinə başlayıb: “Gənc qızlarımız, əsasən, neft-qaz, enerji, kimya laboratoriyası, tədqiqat və idarəetmə, layihə idarə edilməsi və planlaşdırılması, həmçinin İT və rəqəmsal texnologiyalar istiqamətində çalışırlar. Proqram qızlarımız üçün həm maddi, həm də mənəvi dəstək göstərməklə onların peşəkar inkişafına mühüm töhfə verib”.
“Sübut etməyə çalışdıq ki, Azərbaycanda xanımlar mühəndislik istiqamətində təhsil aldıqdan sonra iş dünyasında da özlərini təsdiq edə bilərlər”

Təhsilin İnkişafı Fondunun İdarə Heyətinin sədri Elnur Nəsibov qızları təbrik edərək bildirib ki, rəhbərlik etdiyi fond gənc qızların təhsilinə digər layihələr və proqramlar vasitəsilə də tərəfdaşlar cəlb edir: “Siz ölkəmizin iqtisadi inkişafının, mühəndis layihələrinin, tikinti, inşaat və elektrik kimi bir sıra sahələrin yükünü üzərinizə götürəcəksiniz. Xanımlar ənənəvi olaraq kişilərə aid edilən sahələrdə çalışanda daha məsuliyyətli, diqqətli olurlar. Mən öz müşahidəmdən də görürəm ki, xanım mühəndislərin ortaya qoyduğu layihələr mükəmməl olur”.

Lakin TİF-in fəaliyyət sahəsi mühəndisliklə məhdudlaşmır: “Hazırda kompüter elmləri, tibb, hüquq, hətta milli aviasiya və digər sahələr üzrə də layihələrimiz var. Bu sahələrdə təhsil alan qızlarımıza dəstək verməyimiz bizi çox qürurlandırır. Bu proqram bizim ən çox təbliğ olunan, təşviq edilən layihələrimizdən biridir”.

E.Nəsibov məlumat verib ki, təhsilin inkişafı üçün çox böyük işlər görülür. Ölkə rəhbərinin müvafiq fərmanı ilə hər il 500-dən artıq gənc dünyanın ən yaxşı universitetlərində bakalavr, magistr və doktorantura təhsili alır: “Bu il də maraqlıdır ki, həmin proqramlarda iştirak edən qızlarımızdan bəziləri xaricdə mühəndislik ixtisası üzrə təhsillərini davam etdirəcəklər. Bu da bizi çox sevindirir”.

E.Nəsibovun fikrincə, “Zərif mühəndislər” də çox şanslıdırlar: “Çünki təhsil aldığınız dövrdə artıq təcrübə proqramlarına qatılmaq imkanınız var. STP kimi böyük bir şirkətin yaratdığı bu proqramı biz də diqqətlə izləyirik. Siz böyük zavodların, fabriklərin, istehsalat müəssisələrinin işi ilə tanış olmusunuz. Bu, sizin üçün çox faydalıdır. Mən bir daha STP-yə bu imkanı yaratdığı üçün təşəkkürümü bildirirəm. Çünki bu gün dünyada ixtisasların və peşələrin transformasiyası baş verir. Əmək bazarında tələb olunan sahələr çox sürətlə dəyişir. Bu isə qarşımızda bir sıra çağırışlar yaradır, xüsusən də mühəndislik sahəsində. Yaxşı bir mühəndis bakalavr təhsilini bitirdikdən sonra mütləq şəkildə magistraturada da mühəndislik üzrə oxumalı deyil. O, kompüter texnologiyaları, data analitikası və digər sahələr üzrə də ixtisaslaşa bilər. Çünki siz artıq öz əsas ixtisasınızı tamamlamış olursunuz”. 

E.Nəsibov layihənin məqsədindən də danışıb: “Layihə başlayanda məqsədimiz həm təlimlərlə, həm də təcrübə ilə sizə dəstək olmaq idi. Bu layihənin əsas ideyası layihə çərçivəsində keçirdiyimiz təlimlərdə ortaya çıxmışdı. Qızlarımızdan soruşurdum ki, universiteti bitirdikdən sonra kim olmaq istəyirsiniz? Əksəriyyəti “Asan Xidmət”də, bankda işləyəcəyini deyir, hətta qeyd edirdilər ki, baxım görüm, həyat məni hara aparacaq. Əslində, “Zərif mühəndislər” layihəsinin məqsədi məhz ondan ibarət idi ki, Azərbaycanda xanımlar mühəndislik istiqamətində seçim etmirdilər. İkinci tərəfdən, seçim etsələr belə, aldıqları bilikləri tamamilə kənara qoyaraq başqa sahələrdə işləyirdilər. Layihə çərçivəsində həm qızlarımıza, həm cəmiyyətimizə, həm də özümüzə sübut etməyə çalışdıq ki, Azərbaycanda xanımlar mühəndislik istiqamətində təhsil aldıqdan sonra iş dünyasında da özlərini təsdiq edə bilərlər”.

Qadınlara çağırış: Fürsətlərin hamısından yararlanmağa çalışın

“Vektor” şirkətlər qrupunun baş insan resursları və təşkilati inkişaf inzibatçısı Şölə Əliyeva qeyd edib ki, qadınlar onlar üçün yaradılan fürsətlərin hamısından yararlanmağa çalışmalıdırlar: “Dünyada maddi və insan resursları məhduddur. Hər kəsi resurslarımızdan daha effektiv necə istifadə edə biləcəyimiz narahat edir. Qadınlar dünyadakı insan resurslarının 50 faizini təşkil edir. Təsəvvür etmək çətindir ki, biz bu 50 faizlik resursu istifadə etməyib kənara qoyaq. Ona görə də mən çox sevinirəm ki, siz bu fürsətdən maksimum dərəcədə yararlana bildiniz”.

“Bu proqram bizdə özünəinamı artırdı”

Tədbirdə son söz “Zərif mühəndislər”dən birinə - Səma Cumayevaya verilib. O, layihənin həyatındakı rolundan danışıb: “Düzünü desəm, təcrübəyə başlayanda bu qədər diqqət və qayğı ilə qarşılaşacağımı gözləmirdim. Amma təcrübə müddətində daim böyük dəstək gördüm. Bu proqram bizə dəyərli insanları tanıtdı, özünəinamımı artırdı, qorxmadan əzmlə çalışmağı, daha cəsarətli olmağı öyrətdi. Layihə bitir, amma qazandığımız bilik və bacarıqlar bizimlə qalacaq. Mən STP Polimer şirkətində təcrübə keçdim və mentorlarımızın diqqət və qayğısını yaxından hiss etdim. Onlar bizə yalnız bilik və bacarıqlar öyrətməklə kifayətlənmədilər, həm də motivasiyalı və özünəinamlı olmağımıza böyük töhfə verdilər”.