Naxçıvanda xüsusi kateqoriyadan olan 32 nəfər tələbə adını qazanıb

Naxçıvanda xüsusi kateqoriyadan olan 32 nəfər tələbə adını qazanıb

Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsində ali və orta ixtisas təhsil müəssisələrinə qəbul olan xüsusi kateqoriyadan olan uşaqlarla görüş keçirilib.

Komitədən "Azərbaycan müəllimi"nə verilən məlumata görə, Naxçıvan Muxtar Respublikasının ümumi təhsil müəssisələrini bitirən 1 şəhid övladı, 24 sağlamlıq imkanları məhdud, 7 valideynlərini itirmiş və valideyn himayəsindən məhrum şagird tələbə adını qazanıb.

Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin sədri Ramilə Seyidova bildirib ki, valideyn himayəsindən məhrum və ya valideynlərini itirmiş uşaqların sosial müdafiəsinin gücləndirilməsi məqsədilə ardıcıl işlər aparılır, onların müdafiəsini təmin edən qanunvericilik bazası müasir tələblərə uyğunlaşdırılır: 

"Naxçıvan Muxtar Respublikasında 85 valideyn himayəsindən məhrum uşaq və 2079 sağlamlıq imkanları məhdud uşaq vardır. Bu il ali və orta ixtisas təhsil müəssisələrinə xüsusi kateqoriyadan 1 şəhid övladı, 6 qız və 1 oğlan olmaqla 7 valideyn himayəsindən məhrum uşaq (keçən il 5 nəfər), həmçinin 9 qız və 15 oğlan olmaqla 24 sağlamlıq imkanları məhdud uşaq (keçən il 16 nəfər) qəbul olunub. Ümumilikdə 32 nəfərdən 7 nəfər orta ixtisas, 25 nəfər isə ali təhsil müəssisəsinə daxil olub".

Sonda abituriyentlərə Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi tərəfindən hədiyyələr təqdim edilib və xatirə şəkli çəkdirilib.