Qusarın Cibir kəndində yeni məktəb binası istifadəyə verilib

Qusarın Cibir kəndində yeni məktəb binası istifadəyə verilib 

Sentyabrın 15-də Qusar rayonunun Cibir kəndində inşası tamamlanan 264 şagird yerlik yeni tam orta ümumtəhsil məktəb binası istifadəyə verilib. 

“Azərbaycan müəllimi” xəbər verir ki, tədbirdə Elm və Təhsil Nazirliyinin Aparat rəhbəri Mətin Kərimli, Qusar Rayon İcra Hakimiyyətinin başçısı Sahir Məmmədxanov, Milli Məclisin deputatı Azər Badamov, Quba–Xaçmaz Regional Təhsil İdarəsinin müdiri Coşqun Əliyev, təhsil sektorunun əməkdaşları, müəllimlər, şagirdlər və valideynlər iştirak ediblər.

Müasir təhsil standartlarına uyğun inşa edilən məktəb binası şagirdlərin yüksək səviyyədə təhsil alması üçün zəruri olan bütün şəraitlə təmin olunub. Yeni təhsil müəssisəsində geniş və işıqlı sinif otaqları ilə yanaşı, laboratoriyalar, çağırışaqədərki hazırlıq, əmək təlimi və informatika kabinetləri fəaliyyət göstərəcək. Məktəbdə həmçinin 84 yerlik akt zalı, geniş idman zalı, kitabxana, yeməkxana və açıq idman meydançası da şagirdlərin ixtiyarına verilib.

Bundan əlavə, təhsil müəssisəsində məktəbəqədər hazırlıq üçün xüsusi otağın mövcudluğu kənddə təhsilin bütün pillələrinin kompleks şəkildə təşkilinə imkan yaradacaq.

Yeni təhsil müəssisəsi təkcə Cibir kəndinin deyil, həm də ətraf yaşayış məntəqələrinin şagirdlərinin keyfiyyətli təhsilə çıxışını təmin edəcək. Bu isə uşaqların intellektual, fiziki və sosial inkişafına mühüm töhfə verəcək, kəndin ümumi təhsil səviyyəsinin yüksəldilməsinə şərait yaradacaq.