Bir sinfin 6 məzunu Hüquq fakültəsinin tələbəsi oldu – Məktəbdən reportaj

Bir sinfin 6 məzunu Hüquq fakültəsinin tələbəsi oldu – Məktəbdən reportaj

Bir sinif düşünün, hamısı çalışqan, hamısı məsuliyyətli və indi də hamısı tələbə... Bəli, Naxçıvan şəhər 5 nömrəli tam orta məktəbin 11 “b” sinfinin bütün şagirdləri müxtəlif ali məktəblərə qəbul olunub. Maraqlısı da odur ki, bu 20 nəfərdən 6-sı fərqli ali təhsil müəssisələrində hüquq fakültəsini seçib. Sinifə bir yerdə gəlib-gedən bu sinif yoldaşlar artıq ayrı-ayrı universitetlər oxuyur. Onları birləşdirən isə gələcək arzuları və məktəbləridir.

“Azərbaycan müəllimi” olaraq keçmişin şagirdi, indinin tələbəsi və gələcəyin peşəkar kadları ilə bu məktəbdə görüşürük. Görüşümüzün məqsədi onlarla həmsöhbət olmaq və uğurlarını bölüşməkdir. 

Yolumuzu saldığımız H.Cavid adına Naxçıvan şəhər 5 nömrəli tam orta məktəb “Muxtar Respublikada fəaliyyət göstərən məktəblərin içərisində həmişə sayılıb-seçilən məktəblərdən biri olub və daim yüksək nəticə göstərən şagirdlər yetişdirib”.  Bunu biz yox, şagirdlərin görüşə gəlmələrini gözləyərkən söhbətləşdiyimiz məktəbin direktoru Seymur Xudanov deyir. O əlavə edir ki, bu uğurda təhsilverənlərin çox böyük xidmətləri var: “Hazırda məktəbimizdə 1321 şagird təhsil alır ki, bunların da təlim- tərbiyəsi ilə  pedaqoji təcrübəyə malik ali təhsili 80 müəllim məşğul olur. 

2024-2025-ci tədris ilində məktəbimizi 77 məzun bitirib, bunlardan 75 nəfəri ali təhsil müəssisələrinə sənəd verib, onlardan 50 nəfəri müxtəlif ali təhsil müəssisələrində oxuyur. 9 nəfəri fərqlənmə attestatına layiq görülüb, 16 nəfəri 500-700, 5-i isə 600-700 intervallında nəticə göstərib”.

Əlbəttə, şagirdlərin özlərindən niyə məhz hüquq fakültəsini seçdiklərini soruşacayıq, amma Seymur müəllim bunu belə izah edir: “Bu, onu göstərir ki, məktəbin təməli qanunlar, qaydalar üzərində qurulub, bu gənclər ölkə Prezidentinin həyata keçirdiyi dövlətçilik kursuna sadiq olaraq gələcəkdə Azərbaycanımızı məhz qanun çərçivəsində idarə etmək üçün hüquq fakültəsini seçiblər. Onlardan iki nəfər hüquq fakültəsinin xarici dil sektorunda, ingilis dilində tədris alacaqlar”.

Tələbələr bir-bir məktəbə daxil olur, görüşür, bir müddətdir ki, ayrı qaldıqları üçün sevinclə yeni xəbərləri paylaşırlar. Uzaqdan gördükləri sinif rəhbərləri Günəş Sadıqlı onların təbəssümlərini gülüşə çevirir. 

“Mən sizə deyirdim ki, məktəbdən ötrü darıxacaqsınız, amma inanmırdınız” – müəllimin gileyi, amma bir o qədər da doğma səsi koridorlarda əks-səda verir. Görünür ki, o da sevimli şagirdləri üçün darıxıb. Məktəbdə ingilis dilini tədris edən G.Sadıqlı öz əməyinin bəhrəsini gördüyü üçün qürurlanır. 

Bütün şagirdlər toplandıqdan sonra oxuduqları sinfə keçirlər. Həmin sinif, eyni partalar olsa da, bu dəfə burda qonaqdırlar. Həm də uğur qazanmış tələbə qonaq... “Müəllim sizin üçün və məktəbdən ötrü darıxırıq” deyir biri, biri isə “universitet çox çətindir” deyə dərdini bölüşür. Şirin-şirin etdikləri söhbəti pozmaq  istəməsək də, bu uğurun səbəbini öyrənmək üçün müəllimləri ilə söhbətləşirik. Deyir ki, 2024-2025-ci il tədris ili rəhbəri olduğu sinif üçün çox uğurlu, xüsusi və unudulmaz bir il olub: “Çox qürur hissi ilə söyləyirəm, onların tələbə adını qazanması məni çox sevindirir. Hər biri fərqli uşaqlar idi, dərsdə nə deyirdimsə onu tez qavrayırdılar. Məsuliyyət və çalışqan şagirdlər idi. Şagird, müəllim və valideynlərin birgə dəstəyi çox vacibdir. Biz də bu üçbucaq prinsipi ilə yanaşdıq və sonda da yüksək nəticə əldə etdik. Şagirdlərimizin hamısını təbrik edirəm, ümid edirəm ki, onlar gələcəkdə bundan da böyük uğurlar qazanacaq məktəbimizi və ölkəmizi dünyanın hər yerində təmsil edəcəklər”.

Onların uğur qazanmalarının səbəbi həm də dostluq və sevgidir. Bəs müəllimin “sevimli” şagirdləri necə düşünür?

Sualımızı cavablandıran, 613 balla Naxçıvan Dövlət Universitetinin hüquqşünaslıq fakültəsinə qəbul olan Aysel Səfərova deyir ki, həm yaxşı dostluqlara, həm də yardımlaşmaya görə də bu nəticəni əldə edə biliblər: “Məktəbdə sinif yoldaşlarımla həm rəqabətimiz var idi, həm də dostluğumuz. Təbii ki, bu rəqabət yaxşı yöndə idi, istəyirdik ki, daha yaxşı çalışaq, üstünlük əldə edək. Həm də bir-birimizə köməklik edirdik”.

Məktəbi universitetdən daha çox sevdiyini deyən tələbə niyə məhz hüququ seçdiyini isə belə ifadə edir: “İnsan cəmiyyətdə bəzi haqsızlıqları gördükcə, bunu gələcəkdə necə düzəldərəm, necə əlacı olar haqqında düşünür. Məhz bunun nəticəsi olaraq hüquqşünaslığa həvəsim yaranmışdı, topladığım balla arzumu gerçəkləşdirdim”. 

Uğur Sadıqlı da imtahanlarda yüksək nəticə əldə edərək NDU-nun iqtisadiyyat fakültəsinə qəbul olub. Deyir ki, bu nəticəyə görə əməyi keçən müəllimlərə, məktəb rəhbərliyinə və valideynlərinə borcludur: “Ulu Öndərimiz Heydər Əliyevin bir sözü mənə həmişə stimul olub. O deyirdi ki, “iqtisadiyyatı güclü olan dövlət hər şeyə qadirdir”. Mən bundan sonra da çalışacağam ki, öz iqtisadi bacarıqlarımı inkişaf etdirib bu sahədə dövlətimizə töhfə verim və dünya miqyasında Azərbaycanı təmsil edim. Çalışacağam ki, xalqıma, dövlətimə layiqli bir kadr olaraq da yetişim”. 

Uğur həm də sinif rəhbəri Günəş müəllimin oğludur. Müəllim oğlunu digər şagirdlərdən seçməyib, hər birinə eyni yanaşıb. Bunu Sadiq də təsdiqləyir. Gülə-gülə deyir ki, “digər şagirdlərə necə idisə, mənə qarşı da tələbkar idi”.

Fidan Nəbiyeva isə 525 balla NDU-nun “Dövlət və ictimai münasibətlər” fakültəsinə daxil olub. Deyir ki, ixtisası ürəyincədir: ”Universitetə alışmaqda bir az çətinliklərim var, amma alışacağam. Ali məktəbə hazırlaşanda da çətinliklərim var idi, müəllimlərim və ailəm mənə dəstək göstərirdi. Gələcəkdə planım ixtisasımı bitirib, dövlətə xeyir vermək və sahəm üzrə magistraturada oxumaqdır”.

Tələbələrdən bəziləri müsahibə verməkdən çəkinsə də, Ramiz Səfərova yaxınlaşırıq. O, 535 balla NDU-nun “Tarix” fakültəsinə daxil olub. O deyir ki, bu ixtisasa onu ailəsi yönləndirib: “Ödənişsiz qəbul olduğuma görə təqaüd alacağam, yanvardan sonra universitetdə də yaxşı oxuyaraq uğurumu davam etdirəcəyəm”. 

İnci Salmanova da NDU-nu seçib. O, burada xarici dillər fakültəsinin “İngilis dili tərcümə” ixtisası üzrə təhsil alacaq. Deyir ki, bu, onun uşaqlıq xəyalı olub: “Sevinirəm ki, bu xəyalı artıq gerçəkləşdirmişəm. Bu yolda mənə dəstək olan hər kəsə təşəkkür edirəm.  Həmyaşıdlarıma, gələcək abituriyentlərə isə tövsiyə edirəm ki, sosial şəbəkələrdən yalnız dərsləri üçün istifadə etsinlər və vaxtlarını səmərəli bölsünlər”. İncinin gələcəkdə magistraturada oxumaq və xaricə getmək planı da var, bu ixtisası ona görə seçdiyini deyir.  

Məktəbin digər şagirdləri isə başqa şəhərlərdə universitetlərə daxil olduqları üçün görüşə gələ bilməmişdilər. Uzaqda olsalar da, biz onlarla əlaqə saxlayıb fikirlərini öyrənirik.

Bunlardan biri 674,3 bal toplayaraq Muxtar Respublikada 3-cü qrup üzrə birinci yerin sahibi olan Enes Hüseynlidir. Bakı Dövlət Universitetinin hüquqşünaslıq (tədris ingilis dilində) fakültəsində təhsil alan Enesin məktəbli kimi uğurları çox olub. RFO-da tarix fənnindən final turuna qədər gedib çıxan tələbə deyir ki, imtahana hazırlaşarkən dərsliklərdən əlavə, kənar materiallardan da istifadə edib: "Məncə, uğurun sirri çox çalışmaq yox, sistemli çalışmaqdır. Yəni imtahana düşəcək mövzuları öncədən öyrənib həmin mövzular üzərində tapşırıqların işlənməsi vacibdir. Bundan əlavə, motivasiya da önəmli məsələdir. İmtahandan öncə dostlarla söhbət etmək, ailə ilə vaxt keçirmək vacibdir. Mənə hüquqşünaslıq ixtisası çox dərin və maraqlı olduğu üçün uşaqlıqdan bu sahəyə xüsusi marağım var idi". 

Bakı Dövlət Universitetinin hüquqşünaslıq (tədris ingilis dilində) fakültəsinin birinci kurs tələbəsi Ümid Şıxəliyev də Eneslə bir qrupda oxuyur. Onların məktəbdə başlayan dostluğu universitetdə davam edir. Bir sinif otağında təhsil alan gənclərin gələcəkləri da oxşar, yəni parlaqdır. 671 balla universitetə qəbul olan Ümid deyir ki, sınaq imtahanlarında hər zaman yüksək bal toplayıb: "9-cu sinifdə Azərbaycan dili və ədəbiyyatı üzrə Olimpiadada birinci yerə layiq görülmüşəm. Hədəfim  universiteti bitirdikdən sonra magistratura təhsilimi xaricdə almaqdır. Böyük Britaniyada, yenə hüquqşünaslıq üzrə oxumaq istəyirəm. Sonra ölkəyə qayıdaraq hər hansı bir təşkilatda və yaxud dövlət orqanında çalışmağı fikirləşirəm".

Ümidin də bu ixtisasa marağı uşaq vaxtlarından yaranıb. Deyir ki, valideynləri də onu dəstəkləyib: "Mən deyirdim ki, məktəbi qurtarım, hüquqşünaslığa daxil olub, sonra da peşəkar bir hüquqşünas olum. Qismən arzuma çatmışam. Uğurumun səbəbi də imtahanlara qayda-qanunla çalışmaqdır deyə bilərəm".
Bir partadan digər partaya keçən tələbələrin yenə də məqsədləri, planları və arzuları eynidir. Çalışmaq və layiqli mütəxəssis olmaq... 

Görüş bitdikdən sonra məktəbdən ayrılan tələbələr həsrətlə sağollaşsalar da, məqsədlərinin onları yenidən birləşdirəcəyinin fərqindədirlər.